"Cəmiyyətin inkişafında gender bərabərliyi və ailə institutunun möhkəmlənməsi mühüm əhəmiyyət kəsb edir" - DEPUTAT

"Cəmiyyətin inkişafında gender bərabərliyi, ailə institutunun möhkəmlənməsi və demoqrafik proseslər mühüm əhəmiyyət kəsb edir. Bu sahələrdə qəbul edilən qərarlar və aparılan dövlət siyasəti vətəndaşların sosial rifahına, milli-mənəvi dəyərlərin qorunmasına və ölkənin gələcək inkişafına müsbət təsir göstərir. Azərbaycan demoqrafik göstəriciləri müsbət tendensiya üzrə inkişaf edən ölkələr sırasındadır və əhalinin sayında mütəmadi artım qeydə alınır. Eyni zamanda, müsbət tendensiyalardan biri odur ki, uşaqların sağlamlığı, ana və uşaq ölümlərinin sayının azalması istiqamətində ciddi nəticələr əldə olunub. Bu ilk növbədə ölkənin hər bir bölgəsində yüksək standartlara cavab verən tibb ocaqlarının yaradılması və tibbi xidmətin keyfiyyətinin yüksəldilməsi ilə bağlıdır. Bununla yanaşı, ailələrin sayı artsa da, ailə strukturlarında dəyişikliklər də baş verib – kiçik nüvə ailələrin payı çoxalıb, gənclər arasında gec ailə qurma tendensiyası artıb. Təbii ki, gənclərin ailə qurmağa isti yanaşmaması və yaxud gec ailə qurmağa meyilli olması özlüyündə arzuolunan hal deyil".

Bu sözləri Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, açıqlamasında qeyd edib ki, son on ildə qadınların ictimai-siyasi həyatda, təhsildə və iqtisadi sahədə mövqeyi əhəmiyyətli dərəcədə güclənib:

"Qadın sahibkarların sayının artması, parlamentdə və yerli özünüidarəetmə orqanlarında qadınların təmsilçiliyinin yüksəlməsi bu prosesin bariz göstəricisidir. Gender bərabərliyinə dair dövlət proqramları qadınların həm ailə, həm də ictimai həyatda daha aktiv mövqe qazanmasına şərait yaradıb. Dövlətimizin siyasəti ailə institutunun möhkəmləndirilməsi, uşaqların hərtərəfli inkişafı və qadınların sosial həyatda daha geniş iştirakına yönəlib. Gələcəkdə demoqrafik sabitliyi qorumaq, ailə dəyərlərini möhkəmləndirmək və gənclərin sağlam mühitdə böyüməsini təmin etmək əsas prioritetlərdəndir. Xüsusilə regionlarda məşğulluq imkanlarının artırılması, gənc ailələr üçün dəstək mexanizmlərinin genişləndirilməsi, qadınların sahibkarlığa və elmə daha çox cəlb olunur.
Azərbaycan dövləti hər zaman insan amilini mərkəzə qoyaraq, cəmiyyətin hər bir üzvünün layiqli həyat şəraiti ilə təmin olunması istiqamətində tədbirlər həyata keçirir. Demoqrafik inkişaf, gender balansı və ailə institutunun möhkəmləndirilməsi istiqamətində görülən tədbirlər isə gələcəyimizin daha güclü olmasına xidmət edir".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Gender, ailə və demoqrafiya məsələlərinin işıqlandırılması" mövzusuna uyğun olaraq dərc edilir.

Telegramda izləyin