"Serdar Kılıçın səfəri, Türkiyənin regionda sülh və sabitlik naminə diplomatik səyləri gücləndirmək istəyini nümayiş etdirir" - AÇIQLAMA

Türkiyənin Ermənistanla normallaşma üzrə xüsusi nümayəndəsi Serdar Kılıç Ermənistana səfər edib.

Bunu ölkənin Xarici İşlər Nazirliyinin mətbuat katibi Ani Badalyan bildirib.

"Türkiyə ilə münasibətlərin normallaşdırılması üzrə xüsusi nümayəndə Ruben Rubinyan Ermənistan-Türkiyə sərhədindəki "Marqara" nəzarət-buraxılış məntəqəsində Türkiyənin xüsusi nümayəndəsi Serdar Kılıçı qarşılayıb", - A.Badalyan qeyd edib.

"Türkiyənin Ermənistanla normallaşma prosesi çərçivəsində xüsusi nümayəndəsi Serdar Kılıçın Ermənistana səfəri iki ölkə arasında münasibətlərin yaxşılaşdırılması istiqamətində mühüm addım kimi dəyərləndirilə bilər" - bunu Sonxeber.az -a açıqlama verən politoloq Tural İsmayılov deyib:

"Səfər Türkiyə-Ermənistan münasibətlərində dialoqun davam etdirilməsi və gələcək əməkdaşlıq imkanlarının araşdırılması baxımından əhəmiyyətlidir. Serdar Kılıç "Marqara" sərhəd-buraxılış məntəqəsində Ermənistanın xüsusi nümayəndəsi Ruben Rubinyan tərəfindən qarşılanıb ki, bu da görüşün rəsmi xarakterini və simvolik əhəmiyyətini göstərir. İki ölkə arasında sərhədlərin açılması və iqtisadi əlaqələrin inkişafı kimi məsələlər normallaşma danışıqlarının əsas gündəm maddələri arasında yer alır. Lakin bu prosesdə hər iki tərəfin tarixi və siyasi ziddiyyətləri nəzərə alaraq ehtiyatlı addımlar atdığı müşahidə olunur. Serdar Kılıçın səfəri, Türkiyənin regionda sülh və sabitlik naminə diplomatik səyləri gücləndirmək istəyini nümayiş etdirir. Eyni zamanda Ermənistanın bu səfərə müsbət reaksiya verməsi ölkənin də normallaşma prosesinə hazır olduğunu göstərə bilər, lakin Ermənistana güvənmək olmaz. Prosesin uğurlu olub-olmayacağı tərəflərin qarşılıqlı etimad qurması və konkret razılaşmalar əldə etməsi ilə birbaşa bağlıdır. Azərbaycanın da regionda maraqlı tərəf olduğu nəzərə alınsa, bu səfərin Cənubi Qafqazda daha geniş geosiyasi dinamikaya təsir göstərə biləcəyi ehtimalı var. Xüsusilə, Türkiyə ilə Ermənistan arasında sərhədlərin açılması Azərbaycan-Ermənistan münasibətlərinin normallaşması ilə sinxronlaşdırılmalıdır ki, bu da regional sülhə töhfə verə bilsin. Serdar Kılıçın səfəri, həmçinin Türkiyənin Cənubi Qafqazda lider ölkə kimi rolunu gücləndirmək cəhdinin bir hissəsi kimi də qiymətləndirilə bilər. Ermənistan tərəfi ilə aparılan danışıqların nəticələri, yaxın gələcəkdə tərəflər arasında daha konkret razılaşmaların əldə olunub-olunmayacağını müəyyənləşdirərək. Prosesin uğuru üçün hər iki tərəfin kompromisə hazır olması vacibdir. Ümumilikdə, bu səfər regionda sülh və əməkdaşlıq üçün yeni imkanlar yarada bilər, lakin tarixi problemlər və regional dinamika bu prosesi mürəkkəbləşdirə bilər. Gələcək addımlar normallaşma prosesinin real nəticələrə çevrilməsi baxımından həlledici olacaq".

Telegramda izləyin