"Nyu-Yorkda keçirilən bütün görüşlər Azərbaycanın həm siyasi, həm də iqtisadi maraqlarını ifadə edir" - AÇIQLAMA

Prezident İlham Əliyev BMT Baş Assambleyasının 80-ci sessiyasında iştirak etmək üçün Amerika Birləşmiş Ştatlarının Nyu York şəhərinə işgüzar səfərə gedib.

150-dən çox dövlət və hökumət başçısı iştirak etdiyi BMT Baş Assambleyasının yubiley sessiyasında ölkə başçısı qarşı tərəflərin müraciətləri əsasında bir sıra dövət başçıları, beynəlxalq təşkilat və şirkətlərin rəhbərləri ilə görüşlər keçirib.

"Azərbaycan Prezidentinin Nyu-Yorka işgüzar səfəri həm keçirilən ikitərəfli görüşlərin miqyası, həm də BMT Baş Assambleyasında nəzərdə tutulan çıxışı ilə diqqət mərkəzindədir" - bunu Sonxeber.az -a açıqlama verən politoloq Tural İsmayılov deyib:

"Bu səfərin ən vacib məqamlarından biri Prezidentin qlobal maliyyə nəhənglərinin rəhbərləri ilə görüşləridir. İlham Əliyevin "Brookfield Asset Management", "Neuberger Berman", "Blackstone" kimi dünyanın ən iri investisiya şirkətlərinin rəhbərləri ilə apardığı müzakirələr Azərbaycanın iqtisadi potensialına olan marağın miqyasını aydın şəkildə göstərir. Bu qurumların hər biri beynəlxalq maliyyə bazarında trilyonlarla dollarlıq kapitala nəzarət edir və müxtəlif sahələrdə qlobal təsir imkanına malikdir. Diqqətçəkən məqam ondan ibarətdir ki, həmin görüşlər Azərbaycan tərəfinin deyil, məhz qarşı tərəfin təşəbbüsü ilə baş tutub. Bu, ölkəmizin artan geosiyasi çəkisinin və Prezident İlham Əliyevin etibarlı tərəfdaş kimi qəbul edilməsinin bariz nümunəsidir. Qlobal maliyyə mərkəzlərinin belə təşəbbüsü Azərbaycanın sabit iqtisadi mühitinin, strateji mövqeyinin və güclü investisiya potensialının göstəricisidir.

Azərbaycanın regionda sabitlik və davamlı inkişafın təminatçısı kimi tanınması bu marağı təbii edir. Hər bir belə görüş ölkənin iqtisadi gələcəyinə uzunmüddətli töhfələr verir, yeni investisiya axınlarını təşviq edir. Prezident İlham Əliyev bu müzakirələrdə Azərbaycanın enerji keçidi, alternativ enerji layihələri, nəqliyyat-logistika imkanları və genişlənən əməkdaşlıq platformalarını önə çıxarıb:

Nyu-York səfərinin digər mühüm tərəfi BMT çərçivəsində keçirilən görüşlərdir. Burada da eyni tendensiya nəzərə çarpır – bütün görüşlər qarşı tərəfin təşəbbüsü ilə baş tutur. Bu, Azərbaycanın beynəlxalq münasibətlərdə artan nüfuzunun və liderlik rolunun açıq göstəricisidir. Prezident İlham Əliyevin BMT tribunasından etdiyi çıxışlar hər zaman diqqətlə izlənilir, çünki bu nitqlərdə təkcə regional məsələlər deyil, həm də qlobal təhlükəsizlik və sülh gündəliyinə dair mühüm mesajlar yer alır. Azərbaycanın qlobal liderlik iddiası yalnız iqtisadi və enerji layihələri ilə məhdudlaşmır, həm də sülh quruculuğu proseslərində özünü göstərir. Dövlət başçısının verdiyi mesajlar ölkəmizin prinsipial mövqeyini, milli maraqlara sadiqliyini və beynəlxalq hüquqa hörmətini nümayiş etdirir.

Nyu-Yorkda keçirilən bütün görüşlər Azərbaycanın həm siyasi, həm də iqtisadi maraqlarını ifadə edir. Prezidentin ABŞ-in aparıcı şirkət rəhbərləri ilə görüşləri ölkəmizin investisiya cazibəsini artırır, enerji sahəsindəki imkanlarını qlobal kapital ilə birləşdirən mühüm platforma yaradır. BMT çərçivəsində aparılan ikitərəfli müzakirələr isə Azərbaycanın diplomatik fəallığını və beynəlxalq arenada artan təsir gücünü təsdiqləyir. İlham Əliyevin təşəbbüsləri regional təhlükəsizlik, sülh və əməkdaşlıq məsələlərində Azərbaycanın mövqeyini daha da gücləndirir:

"Ümumilikdə, Prezident İlham Əliyevin Nyu-York səfəri Azərbaycanın iqtisadi, siyasi və diplomatik baxımdan güclənməsinin parlaq göstəricisidir. Bu səfər ölkənin yüksələn nüfuzunu, strateji mövqeyini və qlobal siyasətdə söz sahibinə çevrildiyini bir daha sübut edir. Görüşlərin miqyası, BMT tribunasından veriləcək mesajlar və əldə olunacaq razılaşmalar Azərbaycanın beynəlxalq siyasətdə möhkəmlənən rolunu nümayiş etdirərək ölkəmizin regional gücdən qlobal oyunçuya çevrilməsini təsdiqləyir"

Telegramda izləyin