"Şəhidlərimizin əziz xatirəsi xalqımızın qəlbində daim yaşayacaq" - Bəhruz Quliyev

"27 sentyabr tarixi Azərbaycan xalqının taleyində həm hüzn, həm də qürur günü kimi əbədiləşib. Məhz bu gün 2020-ci ildə Vətən müharibəsi başladı və 44 gün davam edən həmin şanlı mübarizə xalqımızın tarixində dönüş nöqtəsinə çevrildi. Şəhidlərimizin qanı ilə yazılan bu tarix təkcə torpaqlarımızın azad olunması ilə yekunlaşmadı, həm milli birliyimizin, dövlətimizin qüdrətinin və xalqımızın əyilməz iradəsinin təntənəsi oldu. Azərbaycan Ordusu Ali Baş Komandanın rəhbərliyi ilə yüzillik ədalətsizliyə son qoyaraq, işğal altındakı torpaqlarımızı geri qaytardı".

Bu fikirləri Sonxeber.az-a Səs qəzetinin baş redaktoru, siyasi ekspert Bəhruz Quliyev deyib.

O qeyd edib ki, Anım Günü sadəcə şəhidləri, keçmişi xatırlamaq deyil, həm də gələcəyə məsuliyyətlə yanaşmaq deməkdir. Bu gün biz şəhidlərimizin müqəddəs ruhu qarşısında baş əyərək güclü, bütöv və müstəqil Azərbaycanı qoruyub möhkəmləndirməyi özümüzə borc bilirik:

"Şəhidlərimizin əziz xatirəsi xalqımızın qəlbində daim yaşayacaq, onların qəhrəmanlığı gələcək nəsillərə milli iftixar mənbəyi kimi ötürüləcək.

Allah bütün şəhidlərimizə rəhmət eləsin!" - deyə, B.Quliyev bildirib.

Telegramda izləyin