"Real Madrid" iki ulduzunu satmaq istəyir: 350 milyon avro...

İspaniyanın "Real Madrid" klubu hücum xəttində gözlənilməz qərar qəbul edib.

Qaynarinfo xəbər verir ki, Madrid klubu braziliyalı ulduz futbolçuları - Vinisius Junior və Rodriqonu satış siyahısına əlavə edib.

İspaniya mətbuatında yayılan xəbərlərə görə, klub rəhbərliyi hücum planında ciddi dəyişikliklər etməyi düşünür və 350 milyon avrodan artıq gəlir əldə etmək məqsədilə hər iki futbolçunun satılması ehtimalını qiymətləndirir.

Klub prezidenti Florentino Perezin rəhbərliyi altında "Real Madrid" hücum xəttini tamamilə yeniləmək strategiyası çərçivəsində bu addımı atıb. Bununla belə, klub rəhbərliyi mövsümün sonuna qədər futbolçuların çıxışlarını izləyərək son qərarını daha sonra verəcək.

Xəbərdə bildirilir ki, "Real Madrid" rəhbərliyi Vinisius Junior və Rodriqonun bu mövsümdəki qeyri-sabit çıxışlarından narahatdır. Hər iki oyunçunun formadakı dalğalanmaları yay transfer dövrü öncəsi bu strateji satış qərarının əsas səbəbi kimi göstərilir.

Madrid klubunun təxminlərinə görə, bu iki futbolçunun transferindən əldə olunacaq məbləğ təxminən 350 milyon avro olacaq. Bu vəsaitin klubun yeni və irimiqyaslı transferlər həyata keçirməsinə imkan yaradacağı düşünülür. Klub rəhbərliyi hesab edir ki, Vinisius və Rodriqonun birlikdə satışı "Real Madrid" tarixində bənzəri görünməmiş gəlir gətirə bilər.

İspan mətbuatına əsasən, "Real Madrid" artıq potensial alıcı bazarını müəyyənləşdirib. Vinisius Junior üçün Səudiyyə Ərəbistanı klublarının maraqlı ola biləcəyi, Rodriqo üçün isə İngiltərə Premyer Liqası komandalarından təkliflərin gözlənildiyi qeyd edilir.

Telegramda izləyin