"Azərbaycan və Belarus artıq enerji, nəqliyyat və sənaye sahələrində uzunmüddətli layihələr həyata keçirir" - AÇIQLAMA

Azərbaycan və Belarus arasında iqtisadi əməkdaşlıq üzrə birgə Hökumətlərarası Komissiyasının 15-ci iclası keçirilir.

İclasa Azərbaycan tərəfindən Baş nazirin müavini, Komissiyanın həmsədri Samir Şərifov, Belarus tərəfindən isə Baş nazirinin müavini, Komissiyanın həmsədri Natalya Petkeviç rəhbərlik edir.

İclasda Komissiyanın fəaliyyətinin ötən dövr üzrə nəticələri nəzərdən keçiriləcək, iki ölkə arasında strateji tərəfdaşlıq məsələləri müzakirə olunacaq.

"Azərbaycan və Belarus arasında iqtisadi əməkdaşlıq üzrə birgə Hökumətlərarası Komissiyanın 15-ci iclası iki ölkə arasında münasibətlərin inkişafı baxımından mühüm hadisədir. Komissiyanın hər iki tərəfdən yüksək səviyyəli rəhbərliyi iclasın strateji əhəmiyyətini vurğulayır", - bunları Sonxeber.az -a açıqlama verən politoloq Tural İsmayılov deyib:

"Bu toplantı çərçivəsində ötən dövr ərzində görülən işlərin nəticələri qiymətləndiriləcək və əməkdaşlığın konkret layihələri müzakirə olunacaq. İclas, təkcə iqtisadi deyil, həm də siyasi dialoqun dərinləşdirilməsi üçün əhəmiyyətlidir.

Azərbaycan və Belarus artıq enerji, nəqliyyat və sənaye sahələrində uzunmüddətli layihələr həyata keçirir. Bu iclas yeni investisiya imkanlarının açılması və ticarət dövriyyəsinin artırılması baxımından strateji rol oynayır.

Eyni zamanda, tərəflər regionda əməkdaşlıq və qarşılıqlı dəstəyin gücləndirilməsinin önəmini qeyd edirlər. Bu, həm dövlətlərin iqtisadi təhlükəsizliyi, həm də regional stabillik üçün vacibdir.

Politoloji baxımdan, bu iclas Azərbaycanın beynəlxalq əməkdaşlıq şəbəkəsini genişləndirməsi və Belarusla strateji tərəfdaşlıq əlaqələrini möhkəmləndirməsi baxımından əhəmiyyət daşıyır. İclasın nəticələri gələcək əməkdaşlıq istiqamətlərinə də yol göstərəcək".

Telegramda izləyin