"Azərbaycan xalqı tarix boyu görkəmli elm adamları, ziyalıları, yazıçıları ilə şöhrət qazanmışdır" - DEPUTAT

"Cənab Prezident İlham Əliyevin Azərbaycan Milli Elmlər Akademiyasının 80 illik yubileyi münasibətilə etdiyi çıxış Azərbaycan elminə göstərilən yüksək dövlət qayğısının təzahürüdür. Azərbaycan xalqı tarix boyu görkəmli elm adamları, ziyalıları, yazıçıları ilə şöhrət qazanmışdır. Nizami Gəncəvi, Məhəmməd Füzuli, İmadəddin Nəsimi kimi dünya şöhrətli yazıçıların əsərləri, poemaları dillər əzbəri olmuş, Zərifə xanım Əliyeva və Lütfizadə kimi el xadimlərinin nəzəriyyələri, kəşfləri öz sahələri üzrə dünya elmində inqilabi dəyişikliklərə zəmin yaratmışdır. Məhz həmin nəslin davamçıları eyni prinsipiallıq və qərarlılıqla bu gündə ölkə elminin inkişafına, tərəqqisinə zəngin töhfələr verməkdədirlər. Təbii ki, əldə olunan uğurların və nailiyyətlərin kökündə aparılan məqsədyönlü siyasət və şəxsən ölkə rəhbərinin göstərdiyi diqqət və qayğı dayanmaqdadır".

Bu sözləri Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, açıqlamasında qeyd edib ki, dövlət başçısının elm xadimləri qarşısındakı nitqi Azərbaycan elminin inkişaf yoluna verilən yüksək qiymətin və bu sahənin gələcək inkişaf istiqamətlərinin müəyyənləşdirilməsinin bariz nümunəsi idi:

"Çıxışında Ulu Öndər Heydər Əliyevin elmə və ziyalılara göstərdiyi qayğını diqqətə çatdıran ölkə rəhbəri qeyd etdi ki, bu gün həmin siyasət uğurla davam etdirilir və Azərbaycan elmi müasir çağırışlara cavab vermək potensialına yiyələnib. Son illər elmi-tədqiqat sahəsində həyata keçirilən islahatlar, qabaqcıl ölkələrlə qurulan əlaqələr və innovativ idarəetmə modelinə keçid görülən işlərin real nəticəsidir. Cənab Prezident İlham Əliyev vurğuladı ki, artıq 30 ildən çoxdur ki, biz müstəqil dövlət kimi yaşayırıq və Azərbaycan xalqının çoxəsirlik dövlətçilik tarixində Azərbaycan bugünkü qədər güclü olmamışdır. Ona görə müstəqil Azərbaycanın tarixini tədqiq edən, təbliğ edən bir çox əsərlərə ehtiyac var.
On il bundan əvvəl mən bu kürsüdən, eyni zamanda, Azərbaycan dili haqqında danışmışdım, öz narahatlığımı ifadə etmişdim. Deyə bilərəm ki, son 10 il ərzində bu istiqamətdə lazımi addımlar atılıb. Ancaq desəm ki, vəziyyət məni tam qane edir, əlbəttə ki, səmimi olmaram. Azərbaycan dili çox zəngin dildir. Bu gün 50 milyondan çox insan üçün Azərbaycan dili ana dilidir. Mən azərbaycanlıların yaşadıqları müxtəlif bölgələrdə vəziyyətlə müntəzəm surətdə olaraq tanış oluram, diqqətdə saxlayıram, lazımi tədbirlər görürəm. Görürəm ki, bəzi yerlərdə bizim ədəbi dilimiz digər ölkələrdə yaşayan azərbaycanlılar arasında itirilir. Daha çox məişət dili kimi istifadə olunur, xarici kəlmələrlə dolu olur. Ona görə biz öz dilimizi qorumasaq, dilimizi təmiz, saf saxlamasaq, onda yavaş-yavaş dilimizi itirə bilərik. Hər bir millət, hər bir xalq üçün onun Ana dili onun milli mənsubiyyətinin əsas amilidir və bu istiqamətdə bütün ictimai fəallar, bütün ictimaiyyət bir nöqtəyə vurmalıdır. Bizim dilimiz qədimdir. Yenə də deyirəm, 50 milyondan çox insan üçün Ana dilidir, çox zəngindir və xarici kəlmələrə ehtiyac da yoxdur. Bununla yanaşı, Süni intellekt və kibertəhlükəsizlik kimi aparıcı sahələrə toxunan ölkə başçısı bu istiqamətdə ardıcıl görülən işlər barədə ətraflı məlumat verdi. O bilirdi ki, süni intellekt, on il bundan əvvəl bu barədə heç kim heç nə danışmırdı. Bu gün artıq bu, ölkələrin gələcək inkişafının ayrılmaz hissəsidir. Biz burada geri qalmamalıyıq. Ona görə dövlət lazımi addımları atır. Biz hər zaman əsas aparıcı xəttin, yəni, "mainstream"in, əgər belə demək mümkündürsə, arxasınca gedirik və geri qalmamalıyıq. Ona görə Azərbaycanda süni intellektin həm inkişafı, həm də həyatda, iqtisadiyyatda, texnoloji inkişafda tətbiqi bu gün reallıqdır və əlbəttə ki, biz burada Azərbaycan alimlərinin fəal iştirakını gözləyirik".

Günay Ağamalı onu da vurğuladı ki, Azərbaycan və Ermənistan münasibətləri fonunda Qərbi Azərbaycan həqiqətlərindən danışan cənab Prezident İlham Əliyev soydaşlarımızın öz doğma torpaqlarına qayıtmasının zəruriliyini bir daha vurğuladı:

"Azərbaycan vətəndaşları, Azərbaycan gəncləri bizim zəngin tariximizi bilməlidirlər. Bilməlidirlər ki, Azərbaycan xalqının tarixi, dövlətçilik tariximiz, xalqımızın qurub-yaratma qabiliyyəti çoxəsrlidir. Azərbaycan xalqı böyük coğrafiyada yaşayıb və yaşayır. Təkcə onu demək kifayətdir ki, bizim hüdudlarımızın o tayında hər istiqamət üzrə Azərbaycan əhalisi yaşayır. Ermənistanda da yaşayıb, amma oradan qovulub. Amma əminəm ki, yenə də yaşayacaq. Çünki biz bu gün bütün qonşu ölkələrlə sərhədlərimizin o tayında görürük ki, orada Azərbaycan əhalisi öz əzəli tarixi torpaqlarında yaşayır və yaşadıqları ölkələrdə ləyaqətli vətəndaşlar kimi yaşayırlar. Azərbaycanlılar heç vaxt separatizm xəstəliyinə düçar olmamışlar; Bizim xalqımız yaşadığı ölkələrin dövlətçiliyinə töhfə verib və bu gün heç bir ölkədə azərbaycanlılar heç bir dövlət üçün, heç bir başqa xalq üçün problem yaratmır və yaratmayacaq. Ona görə azərbaycanlıların indiki Ermənistana qayıtması Ermənistan xalqını və dövlətini qorxutmamalıdır. Mən bunu artıq bir müddət bundan əvvəl demişəm. Biz öz tarixi torpaqlarımıza qayıtmalıyıq, tanklarla yox, avtomobillərlə qayıtmalıyıq.
Bununla yanaşı, ölkəmiz istər iqtisadi, istərsə də hərbi sənaye sahəsində ciddi işlərə imza atır. Azərbaycan istehsalı hərbi məhsullar dünya silah bazarında ciddi rəğbət qazanıb və bu müsbət dinamika bundan sonra da davam edəcək.
Beləliklə, Prezident İlham Əliyevin AMEA-nın 80 illik yubileyindəki çıxışı bir daha təsdiq etdi ki, Azərbaycan elmin, təhsilin, intellektual kapitalın inkişafını prioritet məsələlərdən biri kimi qiymətləndirir, tarixi həqiqətlərimizi dünya ictimaiyyətinə çatdırmaq istiqamətində qətiyyətli addımlar atır".

Vüsalə İbrahimli

Telegramda izləyin