"Cəmiyyət sağlam və məsuliyyətli sosial media platformalarını, səhifələrini izləməlidir" - AÇIQLAMA

Bundan sonra sosial şəbəkələrdə cəmiyyətə qarşı hörmətsizlik və qeyri-etik paylaşımlar edənlər cərimələnəcək.

Bəs görəsən, bu, cəmiyyəti narahat edən bir qisim kütlənin mənfi davranışların qarşısını almaq üçün yaxşı addımdır?

Bu barədə sosioloq Elçin Bayramlı Sonxeber.az -a açıqlama verib:

"Bu dəyişikliyi ümumilikdə müsbət qiymətləndirirəm. Bu cür yanaşma bir çox ölkələrdə artıq tətbiq olunur. Çünki ictimai və etik normalar var və bu normaların qorunması sağlam cəmiyyətin əsas şərtlərindən biridir. Təəssüf ki, sosial şəbəkələrdə milli-mənəvi dəyərlərə, dövlət atributlarına, tanınmış şəxslərə qarşı təhqirlər, əxlaqsız məzmunun yayılması, zərərli materialların ötürülməsi və psixoloji təsir yaradan paylaşımlar demək olar ki, tam sərbəstdir. Kim nə istəyir, düşünmədən və məsuliyyət hiss etmədən paylaşıb yayır.

Mediada belə məqamlar demək olar ki, yoxdur, çünki medianın özünün etik kodeksi, peşəkar çərçivələri və məsuliyyəti var. Lakin sosial şəbəkələrdə bu xaos artıq dözülməz həddə çatıb. Buna görə də müəyyən cəzaların və cərimələrin tətbiqi vacibdir. Çünki belə əməllər həm gənclərin psixologiyasına mənfi təsir edir, həm də milli-mənəvi dəyərlərin "müasirlik" adı altında gözdən salınmasına gətirib çıxarır.

Bu tip hallara görə həbslər yersizdir, çünki bunlar inzibati xarakterli məsələlərdir. Ən uyğun və balanslı addım cərimələrin tətbiqidir. Eyni zamanda cəmiyyətin özü də bu davranışlara reaksiya verməlidir. Belə şəxsləri izləməmək, bu cür hesabları boykot etmək, onlara diqqət ayırmamaq ən effektiv ictimai qınaq formalarından biridir. Cəmiyyət sağlam informasiya oxumalı, sağlam və məsuliyyətli sosial media platformalarını, səhifələrini izləməlidir.

Məsələ təkcə dövlətin nəzarəti ilə bitmir; həm ictimai qınaq, həm də dövlət tərəfindən müəyyənləşdirilmiş normalar birlikdə tətbiq olunarsa, nəticə daha effektiv olar. Bu, uzunmüddətli perspektivdə həm sosial mühitin, həm də informasiya məkanının sağlamlaşmasına gətirib çıxaracaq."

Telegramda izləyin