"Beynimiz milyon illərdir "pis ola bilər" siqnalını "yaxşı olar" siqnalından daha prioritet hesab edib" - AÇIQLAMA

"İnsan beyninin mənfi düşüncələrə daha həssas yanaşması faktı yeni bilinən bir şey deyil. Təkamül psixologiyası bucağından baxsaq da bu tam anlaşılan məsələdir. Qədim insan kol dibindən gələn xışıltının meymun yox, pələng olma ehtimalına qarşı həssas olmalı idi ki, sağ qala bilsin. Ona görə beynimiz milyon illərdir "pis ola bilər" siqnalını "yaxşı olar" siqnalından daha prioritet hesab edib. Müasir insan isə təhlükəni mütləq reallıqda yox, həm də informasiyada axtarır. Artıq xəbər lentimizdə də "pələng" axtarmağa, görməyə daha meyilliyik".

Bu sözləri Sonxeber.az-a sosioloq Yusif Nəbiyev danışıb.

O, açıqlamasında qeyd edib ki, sosial aspektdən baxanda isə problem daha dərindir:

"Ziqmund Baumanın "axıcı müasirlik" (fluid modernity) konseptinə görə, həyat o qədər dəyişkən və qeyri-sabitdir ki, insanlar riskləri idarə edə bilmirlər və nəticədə narahatlıq bir növ sosial norma halına gəlir. Əvvəllər insanı ailə, qohumluq, icma kimi sabit strukturlar qoruyurdusa, indi fərd təkdir və özü öz dərdinə çarə tapmaq məcburiyyətindədir. Təbii ki, belə şəraitdə beyin müsbətə deyil, təhlükəyə fokuslanır. Çünki təhlükə daha real görünür.

Nəticə baxımından, mənfi fikirlərin daha qalıcı olması sosial münasibətləri zədələyə bilir. İnsan özündə daşıdığı narahatlığı çevrəsinə də ötürür və nəticədə cəmiyyətdə neqativ bir domino effekti yaranır. Yəni fərdi narahatlıq tədricən sosial narahatlığa çevrilir.

Təəssüf ki, bu problem təkcə psixoloji mexanizmin nəticəsi deyil, müasir dünyanın quruluşu da mənfiliyi sistemli şəkildə qidalandırır".

Vüsalə İbrahimli

Telegramda izləyin