Qadın və kişilər arasında emosional dəstək çatışmazlığı necə nəticələrə yol açır? - AÇIQLAMA

Hər bir münasibətin əsasında emosional dəstək dayanır.

Qadın və kişi arasında bu dəstəyin balansı pozulduqda, anlaşılmazlıqlar, soyuqluqlar və hətta boşanmalar ortaya çıxır.

Bəs görəsən qadın və kişilər arasında emosional dəstək çatışmazlığı necə nəticələrə yol aça bilər?

Bu barədə psixoloq Aytən Ələkbərova Sonxeber.az -a açıqlama verib:

"Qadın və kişi arasında emosional dəstəyin çatışmazlığı, çox vaxt uşaqlıqdan gələn pozulmuş emosional balanslardan və ya təməl ehtiyacların ödənilməməsindən qaynaqlanır. Məsələn, uşaqlıqda "sus" və ya "danışma" kimi mesajlarla böyüyən insanlar, böyüdükdə emosional ehtiyaclarını ifadə etməkdə çətinlik çəkə bilərlər.

Xüsusilə qadınlar danışmağa və emosional paylaşmağa daha çox meyillidirlər; statistikaya görə, onların söz bazası kişilərə nisbətən təxminən 1500 dəfə daha genişdir. Lakin çox zaman qadınlar danışmaq istədikdə, qarşı tərəf sakitliyi və susmağı üstün tutur. Bu zaman qadın öz ehtiyacının ödənilmədiyini hiss edir, daha çox danışır və emosional dəstək üçün fərqli yollar axtarır - bəziləri iş yoldaşı ilə, bəziləri yaxın rəfiqəsi ilə duyğularını bölüşür.

Emosional dəstəyin çatışmazlığı uzun müddətdə ciddi nəticələrə gətirib çıxara bilər. İnsanlar dinlənilmədikdə və danışıq balansı təmin olunmadıqda, bu boşluğu doldurmaq üçün başqa yerlərə yönələ bilərlər, bəzən hətta xəyanətə qədər gedə bilən risklər ortaya çıxır.

Kişilər isə çox vaxt öz problemlərini valideynləri ilə bölüşürlər və həyat yoldaşlarından bu cür emosional paylaşımı gözləmirlər. Nəticədə, ailədə soyuqluqlar yaranır, anlaşılmazlıqlar dərinləşir və hətta boşanmalar baş verə bilir.

Bu məsələnin kökündə insanların psixoloji xüsusiyyətləri, emosional durumları və duyğuları idarə etmək qabiliyyəti dayanır. Emosiyaların yığılması və ya ifadə olunmaması, gələcəkdə daha ciddi münasibət problemlərinə yol aça bilər. Ona görə də, həm qadın, həm də kişi üçün açıq və balanslı ünsiyyət, ailədə emosional sağlamlığın qorunması üçün ən vacib amildir"

Telegramda izləyin