"Ramiz Mehdiyevin "5-ci kolonu" Azərbaycanda hər zaman təxribatçı və dövlətimizin inkişafına mane olan bir qüvvə olub" - DEPUTAT

"Ramiz Mehdiyevin Əli Kərimli ilə siyasi koordinasiyası Azərbaycan siyasətində gözlənilən və alışdığımız, köhnə üsulların yenidən canlandırılması cəhdidir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, hər ikisinin yaxınlaşması dövlətimiz üçün təhlükə və təxribatdır:

"Çünki bu iki şəxsin ittifaqı açıq şəkildə öz şəxsi və qrup maraqlarına xidmət etmək üçün qurulub. Xarici anti-Azərbaycan qüvvələrin əlində oyuncaq olan və onlar tərəfindən idarə edilən Əli Kərimli və onunla eyni məzhəbə qulluq edən digər "milli" satqınlar son beş ildə Azərbaycanın əldə etdiyi böyük tarixi qələbələrə kölgə salmaq və xarici mərkəzlərin bu yöndə apardığı fəaliyyətlərə dəstək vermək üçün çalışıb. Onların əsl siması Azərbaycan cəmiyyətinə məlumdur. Cəmiyyətdən heç bir dəstək görməyən Əli Kərimli bütün ümidini indiyə qədər onu bəsləyən xarici anti-Azərbaycan qüvvələrə bağlayıb".

Deputat vurğulayıb ki, Əli Kərimlinin evində axtarış aparılması, Rusiyaya yazılan məktubun və həmin müraciətin ortaya çıxması gözləniləndir:

"Bu cür addımlar dəfələrlə təkrarlanıb. Ramiz Mehdiyevin "5-ci kolonu" Azərbaycanda hər zaman təxribatçı və ölkənin inkişafına mane olan bir qüvvə olub. Bir zamanlar hakimiyyətin tərəfdarlarından olan, prezident seçkilərində cənab İlham Əliyevi müdafiə edən, onun haqqında uzun çıxışlar edən Gültəkin Hacıbəyli birdən birə müxalifət olmaq qərarına gəldi. Bu sualın cavabı da Ramiz Mehdiyev işində bizə məlum oldu. Bir daha əmin olduq ki, özünü xalq fədailəri kimi göstərənlər əslində ancaq öz mənfəətlərini güdürlər".

Deputat Ramiz Mehdiyev vəzifədə olduğu müddətdə AXCP və "Milli Şura" hər 3 aydan bir mitinq, aksiya təşkil etdiyini də qeyd edib:

"Əgər fikir vermisinizsə 2019-cu ildə Ramiz Mehdiyev vəzifəsindən azad olunduqdan sonra AXCP və "Milli Şura" bir dəfə də olsun mitinq və aksiya keçirmədi. Eyni zamanda, Əli Kərimli heç zaman hər hansı bir çıxışında birbaşa Ramiz Mehdiyevi tənqid etməyib. Ramiz Mehdiyev Əli Kərimli, Cəmil Həsənli, Gültəkin Hacıbəyli, eyni zamanda şər-böhtan yayan mühacir mətbuatla birlikdə Azərbaycana qarşı hər zaman təxribat aparsa da heç zaman uğur qazanmağa nail ola bilmədi. Çünki xalq onlara inanmır və həqiqəti görür. Bu gün xalq verilən bütün sözlərini tutan, ölkəmizi dünyada güclə dövlətlər sırasına daxil edən və ən önəmlisi isə vətəndaşlarımızın təhlükəsiz, firavan yaşayışını təmin edən cənab prezident İlham Əliyevə güvənir, onun uğurla davam etdirdiyi Ulu Öndər Heydər Əliyev siyasətini dəstəkləyir".

Telegramda izləyin