İnsanlarda artan stress və anksiyetenin əsas səbəbləri nədir? - AÇIQLAMA

Son dövrlər həm böyüklər, həm də yeniyetmələr arasında anksiyete və stress simptomlarının kəskin artması psixoloqların diqqətini çəkir.

İnsanlarda artan stress və anksiyetenin əsas səbəbləri nədir?

Bu barədə psixoloq Aytən Ələkbərova Sonxeber.az -a açıqlama verib:

"Bu gün qəbuluma müraciət edən insanların yarısı anksiyete və ciddi stress şikayətləri ilə üzlərini tutdular. Pasiyentlərin bir çoxu bədənlərində baş verən dəyişikliklərin səbəbini anlamadıqlarını deyirlər. Onlarda nəfəs darlığı, ürəkdə sıxıntı, başgicəllənmə, hətta qusma kimi psixosomatik əlamətlər müşahidə olunur. Bu simptomlar çox vaxt tibbi yox, məhz psixoloji mənşəli olur.

Daha ağır bir hadisədə isə 16 yaşlı bir qızı anası döyərək ginekoloqa aparıb. Qızın tez-tez qusmasından şübhələnən ana bunun psixoloji səbəbini düşünmədən, birbaşa ginekoloji problem axtarıb. Halbuki həmin yeniyetmədə aydın şəkildə anksiyete pozuntusunun əlamətləri var idi. Bu yanaşma qızın psixikasında daha böyük travmalar yaradaraq, onun öz bədəninə və duyğularına güvənini sarsıdıb.

Valideynlər çox zaman uşaqların və yeniyetmələrin bədən reaksiyalarının psixoloji mənşəli ola biləcəyini nəzərə almırlar. Halbuki anksiyete yaşayan uşaqlar hiss etdiklərini ifadə edə bilmədikləri üçün bu hal daha çox somatik şikayətlərlə - qusma, qarın ağrısı, titrətmə, nəfəs darlığı ilə özünü göstərir.

Üstəlik, cəmiyyət olaraq hədsiz məlumatlanma dövrü yaşayırıq. İnformasiyanın fasiləsiz axını, sosial şəbəkələrdə neqativ xəbərlərlə dolu gündəm insanlarda informativ stress yaradır. Bu stress isə zamanla anksiyete pozuntusuna çevrilə bilir.

Pandemiya, müharibələr, yanğınlar və digər kütləvi travmatik hadisələr də insanların psixoloji yükünü artıran əsas amillərdir. Xüsusilə həssas düşüncə tərzinə malik, dəyişikliklərə çətin adaptasiya olan insanlar bu vəziyyətə daha çox meylli olurlar.

Bu səbəbdən həm valideynlərin, həm də böyüklərin öz psixoloji vəziyyətinə diqqət etməsi, bədən reaksiyalarını düzgün oxumağı öyrənməsi vacibdir. Çünki bir çox fiziki şikayətin arxasında əslində idarə olunmayan duyğular və yığılmış stress dayanır"

Telegramda izləyin