"Kolumbiya Azərbaycan üçün Latın Amerikasında təkcə iqtisadi tərəfdaş deyil, həm də strateji bir dostdur" - AÇIQLAMA

Xarici işlər naziri Ceyhun Bayramov Kolumbiyanın Azərbaycandakı səfiri Luis Fernando Kuartas Ayalanı diplomatik fəaliyyətinin başa çatması ilə əlaqədar qəbul edib.

Bildirilib ki, nazir Ceyhun Bayramov iki ölkə arasında mövcud münasibətlərin inkişafını məmnunluqla qeyd edərək bu istiqamətdə göstərdiyi səylərə görə səfirə təşəkkürünü bildirib.

Görüş zamanı iki ölkə arasında mövcud siyasi dialoqun qorunub saxlanılması və inkişaf etdirilməsində qarşılıqlı səfər və təmasların, eləcə də siyasi və konsulluq məsləhətləşmələrinin əhəmiyyəti qeyd olunub.

Ceyhun Bayramov BMT-nin İqlim Dəyişmələri üzrə Çərçivə Konvensiyasının 29-cu sessiyası (COP29) çərçivəsində Kolumbiyanın xarici işlər naziri Luis Gilberto Muriyo ilə keçirdiyi görüşü məmnunluqla xatırladaraq bu cür təmasların ikitərəfli və çoxtərəfli əməkdaşlığın inkişafında mühüm rol oynadığını vurğulayıb.

Azərbaycan və Kolumbiya arasında ikitərəfli əsasda, habelə BMT, Qoşulmama Hərəkatı kimi beynəlxalq təşkilatlar çərçivəsində çoxtərəfli müstəvidə əməkdaşlığın vacibliyi diqqətə çatdırılıb.

Ceyhun Bayramov Luis Fernando Kuartas Ayalanın Azərbaycan-Kolumbiya münasibətlərinin inkişafına verdiyi töhfəni yüksək qiymətləndirərək ona gələcək fəaliyyətində uğurlar arzulayıb.

Tərəflər həmçinin qarşılıqlı maraq doğuran digər ikitərəfli məsələlər ətrafında fikir mübadiləsi aparıblar.

"Bir politoloq nəzəriyyəsi ilə yanaşsaq, bu görüş sadəcə bir diplomatın yolasalma mərasimi deyil, Azərbaycanın Cənubi Amerika regionunda möhkəmlənən nüfuzunun və bu istiqamətdə qurduğu balanslı xarici siyasət kursunun təzahürüdür", - bunu Sonxeber.az -a açıqlama verən politoloq Tural İsmayılov deyib:

"Kolumbiya Azərbaycan üçün Latın Amerikasında təkcə iqtisadi tərəfdaş deyil, həm də beynəlxalq hüququn prinsipləri, xüsusilə ərazi bütövlüyü və suverenlik məsələlərində ortaq mövqedən çıxış edən strateji bir dostdur.
​İki ölkə arasındakı münasibətlərin dinamikasına nəzər saldıqda görürük ki, siyasi dialoqun yüksək səviyyədə saxlanılması hər iki tərəf üçün xüsusi əhəmiyyət kəsb edir. Nazir Ceyhun Bayramovun COP29 çərçivəsində kolumbiyalı həmkarı Luis Gilberto Muriyo ilə görüşünü xatırlatması, iqlim diplomatiyasının ikitərəfli əlaqələrdə yeni və hərəkətverici qüvvəyə çevrildiyini təsdiqləyir. Bu, Bakının qlobal gündəmi müəyyən edən mövzularda - yaşıl enerji və ekoloji təhlükəsizlik kimi sahələrdə - Cənubi Amerika ölkələri ilə sinerji yaratmaq istəyindən xəbər verir. Eyni zamanda, BMT və Qoşulmama Hərəkatı daxilindəki əməkdaşlığın vurğulanması göstərir ki, Azərbaycan "Qlobal Cənub"un maraqlarının müdafiəçisi qismində Kolumbiya ilə çoxtərəfli platformalarda vahid cəbhədən çıxış etməkdə maraqlıdır.
​Səfir Ayalanın fəaliyyəti dövründə konsulluq və siyasi məsləhətləşmələrin intensivləşməsi iki ölkə arasındakı bürokratik və siyasi maneələrin minimuma endirilməsinə xidmət edib. Politoloji baxımdan bu, Azərbaycanın xarici siyasətinin diversifikasiyası deməkdir; rəsmi Bakı Avro-Atlantik məkanla yanaşı, dünyanın digər uzaq nöqtələrində də öz diplomatik dayaqlarını gücləndirir. Bu cür yaxınlaşma Ermənistanın Latın Amerikasındakı ənənəvi təbliğatına qarşı effektiv bir sipər rolunu oynayır və Azərbaycanın həqiqətlərinin bu regionda daha obyektiv qəbul edilməsini təmin edir. Yekun olaraq, bu qəbul göstərir ki, Azərbaycan və Kolumbiya arasındakı münasibətlər konyuktur xarakter daşımır və qarşıdakı dövrdə həm iqtisadi, həm də humanitar sahələrdə daha dərin inteqrasiya üçün möhkəm zəmin mövcuddur".

Telegramda izləyin