"Azərbaycanın dünya birliyinə inteqrasiyası ardıcıl və düşünülmüş dövlət siyasətinin nəticəsidir" - DEPUTAT

"Azərbaycan Respublikasının dünya birliyinə inteqrasiyası və beynəlxalq əməkdaşlığın genişlənməsi bu gün ölkənin dövlət siyasətində əsas strateji xətt kimi çıxış edir. Qlobal geosiyasi dövr şəraitində Azərbaycan milli maraqlara əsaslanan xarici siyasət kursu ilə regionda və beynəlxalq müstəvidə etibarlı tərəfdaş kimi tanınır. Hazırda Azərbaycan region ölkələri, Avropa, Asiya və Yaxın Şərq dövlətləri, eləcə də nüfuzlu beynəlxalq təşkilatlarla əlaqələrini daha da genişləndirir. Enerji təhlükəsizliyi, nəqliyyat və logistika layihələri, xüsusilə Orta Dəhliz və Şimal-Cənub marşrutları Azərbaycanın qlobal iqtisadi və ticarət əlaqələrində rolunu daha da artırır. Eyni zamanda, yaşıl enerji, iqlim dəyişiklikləri ilə mübarizə və sülh təşəbbüsləri ölkənin beynəlxalq əməkdaşlığında xüsusi yer tutur".

Bu sözləri Sonxeber.az-a Milli Məclisin deputatı Aydın Hüseynov danışıb.

O, açıqlamasında qeyd edib ki, bu proseslərin əsas xüsusiyyətlərindən biri ondan ibarətdir ki, Prezident İlham Əliyevin rəhbərliyi ilə formalaşdırılan xarici siyasət kursu Azərbaycanın beynəlxalq nüfuzunun artmasına və dünya birliyi ilə münasibətlərinin daha sistemli və məqsədyönlü şəkildə inkişafına zəmin yaradır:

"Bu proses strateji planlaşdırma ilə dəstəklənir. "Azərbaycan 2030: sosial-iqtisadi inkişafa dair Milli Prioritetlər" sənədi ölkənin qlobal iqtisadi sistemə daha dərin inteqrasiyasını, rəqabətqabiliyyətli iqtisadiyyatın formalaşdırılmasını və beynəlxalq dəyər zəncirlərində fəal iştirakını nəzərdə tutur. İşğaldan azad edilmiş ərazilərin bərpası və yenidən qurulması da beynəlxalq tərəfdaşlarla birgə həyata keçirilən layihələr vasitəsilə Azərbaycanın açıq əməkdaşlıq modelini nümayiş etdirir.

Beynəlxalq inteqrasiyanın hüquqi bazasının möhkəmləndirilməsi isə xüsusi əhəmiyyət daşıyır. Qanunvericiliyin beynəlxalq norma və standartlara uyğunlaşdırılması, investisiya və biznes mühitinin təkmilləşdirilməsi, şəffaflıq və institusional islahatlar Azərbaycanın dünya birliyi ilə əlaqələrinin davamlılığını təmin edən əsas amillərdəndir. Bu baxımdan Milli Məclisin rolu da önəmlidir. Parlament beynəlxalq müqavilələrin ratifikasiyası, parlament diplomatiyasının genişləndirilməsi və beynəlxalq təşkilatlarla əməkdaşlıq vasitəsilə Azərbaycanın mövqelərinin beynəlxalq arenada daha dolğun ifadəsinə töhfə verir.

Ümumilikdə, Azərbaycanın dünya birliyinə inteqrasiyası ardıcıl və düşünülmüş dövlət siyasətinin nəticəsi olaraq milli maraqların qorunması ilə beynəlxalq əməkdaşlığın uzlaşdırılmasını təmin edir və ölkənin qlobal miqyasda mövqelərinin möhkəmlənməsi üçün etibarlı zəmin yaradır".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Azərbaycan Respublikasının dünya birliyinə inteqeasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi" mövzusuna uyğun olaraq dərc edilir.

Telegramda izləyin