"Bütün bu uğurların yeganə və şəriksiz memarı Möhtərəm Cənab Prezident İlham Əliyevdir" - DEPUTAT

"Möhtərəm Cənab Prezident İlham Əliyevin yerli televiziya kanallarına verdiyi müsahibə Azərbaycanın son onilliklərdə keçdiyi mürəkkəb, lakin şərəfli yolun açıq və prinsipial təhlilidir. Müsahibə xüsusilə, 907-ci düzəliş mövzusu ətrafında səsləndirilən fikirlər bir daha göstərdi ki, Azərbaycan necə haqsız, ikili standartlarla mübarizə aparan dövlətdir.
907-ci düzəliş Azərbaycan xalqına qarşı edilmiş açıq ədalətsizliyin rəsmi sənədə çevrilmiş forması idi. Cənab Prezident İlham Əliyevin bu məsələyə tarixi kontekstdə yanaşması çox vacib məqamları üzə çıxardı. Bir tərəfdən erməni lobbisinin sistemli fəaliyyəti, digər tərəfdən isə o dövrdə Azərbaycan dövlətçiliyinin zəifliyi və səriştəsiz idarəçilik. Həmin illərdə Azərbaycan nə öz sözünü deyə bilirdi, nə də haqqını müdafiə etməyə gücü çatırdı. Bunun nəticəsi olaraq işğala məruz qalan, Xocalı soyqırımını yaşamış bir ölkə "blokada tətbiq edən tərəf" kimi təqdim olundu. Bu, siyasi riyakarlığın klassik nümunəsi idi".

Bu sözləri Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, açıqlamasında qeyd edib ki, ölkə başçımızın Co Baydenin 907-ci düzəlişin qəbulundakı fəal rolunu konkret adla xatırlatması təsadüfi deyil:

"Bu, münasibətlərin niyə uzun illər ərzində soyuq, hətta böhranlı olmasının səbəblərini izah edən açar məqamdır. Azərbaycan bu dövrdə heç vaxt emosional davranmadı, prinsipial mövqeyindən geri çəkilmədi və öz milli maraqlarını qətiyyətlə qorudu. Dövlət başçısının "biz sizə bir gün lazım olacağıq" fikri bu gün reallığa çevrilir.
Tramp administrasiyasının gəlişi ilə ABŞ-Azərbaycan münasibətlərində yeni mərhələnin başlandı.

Müsahibədə səsləndirilən digər mühüm məqamlar Azərbaycanın 2025-ci ildə xarici siyasətdə əldə etdiyi uğurları açıq şəkildə nümayiş etdirdi. Çinlə Hərtərəfli Strateji Tərəfdaşlıq haqqında Birgə Bəyannamənin imzalanması Azərbaycanın artıq qlobal güc mərkəzləri tərəfindən etibarlı tərəfdaş kimi qəbul edildiyini təsdiqləyir. D-8 təşkilatına üzvlük isə ölkəmizə göstərilən beynəlxalq etimadın və hörmətin açıq ifadəsidir. Azərbaycan bu platformaya müstəqil siyasəti, sabitliyi və regional çəkisi ilə daxil olub.

Xüsusilə Mərkəzi Asiya Məşvərət Şurasına tamhüquqlu üzv seçilməyimiz tarixi hadisədir. Siyasi etimadın əsas götürüldüyü bu qərar Azərbaycanın regionlararası körpü rolunu təsdiqləyir. Bu gün Mərkəzi Asiyanı Qərblə bağlayan ən etibarlı marşrut məhz Azərbaycan üzərindən keçir və bu nəqliyyat məsələsi geosiyasi gücdür.
Xankəndidə keçirilən ECO Zirvə Görüşü, Şuşa, Laçın və Ağdamda təşkil olunan beynəlxalq forumlar artıq Qarabağın beynəlxalq dialoq məkanına çevrildiyini sübut etdi. Qəbələdə keçirilən Türk Dövlətləri Təşkilatının Zirvə Görüşü Türk dünyasının real birlik modelinin formalaşdığını göstərdi".

Deputat onu da vurğuladı ki, Cənab Prezidentin müsahibəsi bir daha sübut etdi ki, Azərbaycan təşəbbüs göstərən, istiqamət müəyyən edən, regionun siyasi arxitekturasını formalaşdıran dövlətdir:

"Bu siyasətin mərkəzində milli maraqlar dayanır. Azərbaycan güclüdür. Gücümüz iqtisadi göstəricilərdə, siyasi yaddaşda, düzgün və vaxtında verilən qərarlardadır. Bütün bu uğurların yeganə və şəriksiz memarı Möhtərəm Cənab Prezident İlham Əliyevdir. Dövlətimizin gələcəyi məhz bu möhkəm təməl üzərində qurulur".

Vüsalə İbrahimli

Telegramda izləyin