"Çinlə münasibətlər Azərbaycanın iqtisadi diplomatiyasının mühüm komponentidir" - DEPUTAT

"Müasir beynəlxalq münasibətlər sistemində dövlətlərin uğuru təkcə hərbi və ya iqtisadi potensialla deyil, eyni zamanda düzgün qurulmuş diplomatik xətt və çevik siyasi manevr qabiliyyəti ilə ölçülür. Prezident İlham Əliyevin yerli televiziya kanallarına verdiyi müsahibədə səsləndirilən fikirlər bir daha təsdiqləyir ki, Azərbaycan bu baxımdan regionun ən balanslı və praqmatik xarici siyasət modelinə malik dövlətlərindən biridir. Azərbaycanın son illərdə həyata keçirdiyi xarici siyasət milli maraqlara əsaslanan və çoxqütblü dünya reallıqlarına uyğunlaşdırılmış strateji xətt kimi xarakterizə olunur. Prezident İlham Əliyev açıq şəkildə bildirir ki, Azərbaycan heç bir güc mərkəzinin orbitində yer almır, eyni zamanda bütün əsas beynəlxalq aktorlarla qarşılıqlı hörmət və bərabərhüquqlu əməkdaşlıq prinsipləri əsasında münasibətlər qurur".

Bu sözləri Sonxeber.az-a Milli Məclisin deputatı Şahin Seyidzadə danışıb.

O, açıqlamasında qeyd edib ki, müsahibədə xüsusi vurğulanan əsas məqamlardan biri beynəlxalq sistemin artıq təkqütblü və ya ikiqütblü modeldən uzaqlaşmasıdır:

"Prezident İlham Əliyevin fikrincə, dünya sürətlə çoxqütblü mərhələyə daxil olur və bu reallıq kiçik və orta ölçülü dövlətlər üçün həm risklər, həm də imkanlar yaradır. Azərbaycan isə bu imkanlardan rasional şəkildə istifadə etməyi bacaran nadir ölkələr sırasındadır.

Azərbaycanın xarici siyasət fəlsəfəsinin mərkəzində müstəqil qərarvermə dayanır. Heç bir beynəlxalq mərkəzdən asılı olmayan bu siyasət ölkənin suverenliyini möhkəmləndirməklə yanaşı, onun beynəlxalq nüfuzunu da artırır. Prezidentin müsahibədə qeyd etdiyi kimi, Azərbaycan bu gün beynəlxalq münasibətlər sistemində etibarlı, sözünün sahibi olan və verdiyi öhdəliklərə sadiq qalan dövlət kimi qəbul olunur".

Deputat onu da vurğuladı ki, müsahibədə ABŞ-Azərbaycan münasibətlərinə dair səsləndirilən fikirlər xüsusi diqqət çəkir:

"Prezident İlham Əliyev vurğulayır ki, uzun müddət müəyyən səbəblərdən zədələnmiş ikitərəfli münasibətlər yeni mərhələyə qədəm qoymuşdur. ABŞ Prezidenti Donald Tramp ilə keçirilmiş görüşlər, eləcə də Birgə Bəyannamənin imzalanması münasibətlərin normallaşmasının və qarşılıqlı etimadın bərpasının rəsmi göstəricisidir. Bu sənədlər sübut edir ki, ABŞ Azərbaycanı regionda mühüm tərəfdaş kimi qəbul edir. Enerji təhlükəsizliyi, nəqliyyat-logistika layihələri və regional sabitlik məsələlərində Azərbaycanın rolu Vaşinqton tərəfindən real qiymətləndirilir. Prezident İlham Əliyevin müsahibədə vurğuladığı kimi, bu münasibətlər heç bir üçüncü tərəfə qarşı yönəlməyib və sırf qarşılıqlı maraqlara əsaslanır. ABŞ ilə əməkdaşlıq Azərbaycanın xarici siyasətinin yalnız bir istiqamətidir və bu, balanslı siyasətin tərkib hissəsi kimi dəyərləndirilir. Azərbaycan nə Vaşinqtondan asılıdır, nə də onun siyasi diktəsi altında fəaliyyət göstərir. Əksinə, münasibətlər qarşılıqlı hörmət və bərabər tərəfdaşlıq prinsiplərinə əsaslanır.

Prezident İlham Əliyevin müsahibəsində Çin Xalq Respublikası ilə münasibətlərə dair səsləndirdiyi fikirlər Azərbaycanın Asiya istiqamətində artan geosiyasi çəkisini açıq şəkildə nümayiş etdirir. Çinlə imzalanmış strateji tərəfdaşlıq haqqında Bəyannamə iki ölkə arasında münasibətlərin yeni, daha yüksək səviyyəyə qalxdığını göstərir. Azərbaycan Çinin "Bir kəmər, bir yol" təşəbbüsündə mühüm tranzit ölkə kimi çıxış edir. Şərq-Qərb nəqliyyat dəhlizinin əsas halqalarından biri olan Azərbaycan bu layihə çərçivəsində həm iqtisadi dividendlər əldə edir, həm də geosiyasi əhəmiyyətini artırır. Prezident İlham Əliyevin vurğuladığı kimi, bu əməkdaşlıq qarşılıqlı fayda prinsipinə əsaslanır və heç bir siyasi şərt daşımır.

Çinlə münasibətlər Azərbaycanın iqtisadi diplomatiyasının mühüm komponentidir. İnfrastruktur layihələri, logistika mərkəzləri, sənaye parkları və texnoloji əməkdaşlıq bu tərəfdaşlığın real nəticələridir. Bu fakt bir daha göstərir ki, Azərbaycan yalnız xammal ixrac edən ölkə deyil, eyni zamanda regional iqtisadi qovşağa çevrilmək strategiyasını uğurla həyata keçirir. Müsahibədə Türk Dövlətləri Təşkilatına xüsusi yer ayrılması təsadüfi deyil. Prezident İlham Əliyev bu təşkilatı Azərbaycanın xarici siyasətinin prioritet istiqamətlərindən biri kimi təqdim edir. Türk dünyası ilə münasibətlər təkcə diplomatik deyil, həm də tarixi, mədəni və ideoloji əsaslara söykənir. Azərbaycan Türk Dövlətləri Təşkilatının güclənməsində aparıcı rol oynayır. Enerji, nəqliyyat, müdafiə və humanitar sahələrdə əməkdaşlıq təşkilatın institusional əsaslarını möhkəmləndirir. Prezident İlham Əliyevin müsahibədə vurğuladığı kimi, Türk dünyası artıq sadəcə mədəni birlik deyil, real geosiyasi aktora çevrilməkdədir.

Türkiyə ilə müttəfiqlik münasibətləri bu birliyin əsas dayağıdır. Şuşa Bəyannaməsi ilə rəsmiləşdirilmiş strateji müttəfiqlik modeli regional təhlükəsizliyin təminatçısı kimi çıxış edir və Türk dünyasının siyasi birliyinə real məzmun qazandırır. Prezident İlham Əliyevin müsahibəsində təqdim olunan mənzərə göstərir ki, Azərbaycanın çoxqütblü diplomatiyası artıq nəzəri konsepsiya deyil, real nəticələr verən praktik modeldir. ABŞ, Çin, Avropa İttifaqı, Rusiya və Türk dünyası ilə paralel və balanslı münasibətlər Azərbaycanın manevr imkanlarını genişləndirir və onu regional sabitliyin əsas dayaqlarından birinə çevirir.

Bu siyasətin əsas üstünlüyü ondadır ki, Azərbaycan heç bir güc mərkəzi ilə qarşıdurmaya getmir, eyni zamanda öz milli maraqlarından da geri çəkilmir. Prezident İlham Əliyevin ifadə etdiyi kimi, "bizim siyasətimiz milli maraqlara söykənir və bu maraqlar dəyişməzdir".

Nəticə etibarilə, Prezident İlham Əliyevin müsahibəsi Azərbaycanın xarici siyasətinin mahiyyətini - müstəqillik, balans, praqmatizm və strateji baxış prinsiplərini - aydın şəkildə ortaya qoyur. Bu diplomatik model Azərbaycanın yalnız bugünkü mövqelərini möhkəmləndirmir, eyni zamanda onun gələcək onilliklər üçün təhlükəsiz və davamlı inkişafını təmin edir".

Telegramda izləyin