"Bu gün Azərbaycanın ümumi generasiya gücü 10 min meqavat civarındadır" - DEPUTAT

"2026-cı il yanvarın 8-də "Xızı-Abşeron" Külək Elektrik Stansiyasının rəsmi açılış mərasimi Azərbaycanın iqtisadi inkişaf və enerji siyasətində yeni mərhələnin başlanğıcı kimi dəyərləndirilə bilər", - bunu Sonxeber.az -a açıqlama verən deputat Şahin Seyidzadə deyib:

"Prezident İlham Əliyevin mərasimdə səsləndirdiyi fikirlər bir daha göstərdi ki, Azərbaycan təkcə enerji istehsalçısı deyil, həm də qlobal enerji təhlükəsizliyinə töhfə verən məsuliyyətli dövlətdir. Dövlət başçısı çıxışında vurğuladı ki, 240 meqavat gücündə olan bu stansiya ölkənin ümumi inkişafına mühüm töhfə verəcək, enerji balansını daha da gücləndirəcəkdir. Bu layihə Azərbaycanın bərpaolunan enerji strategiyasının real nəticələr verdiyini nümayiş etdirir. Prezident qeyd etdi ki, 2022-ci ildə təməli qoyulan stansiyanın qısa müddətdə istifadəyə verilməsi planlı və düşünülmüş dövlət siyasətinin göstəricisidir. Prezident İlham Əliyev investor "ACWA Power" şirkətinin fəaliyyətini yüksək qiymətləndirərək bildirdi ki, bu şirkət dünyada bərpaolunan enerji sahəsində aparıcı mövqelərdən birini tutur. Onun Azərbaycanda ilk layihəsini uğurla başa çatdırması gələcəkdə daha böyük layihələrin reallaşdırılmasına yol açır. Xüsusilə Xəzər dənizinin suyunun duzsuzlaşdırılması layihəsinin bu şirkət tərəfindən icra ediləcək olması ölkəmizin su və enerji təhlükəsizliyi baxımından strateji əhəmiyyət daşıyır. Çıxışda beynəlxalq əməkdaşlıq amili də xüsusi yer aldı. Prezident İlham Əliyev "Power China" şirkətinin baş podratçı kimi fəaliyyətini qeyd edərək, bu şirkətin gələcəkdə Azərbaycanda investor kimi də çıxış edəcəyinə əminliyini ifadə etdi. Bu fakt Azərbaycanın qlobal enerji bazarında etibarlı tərəfdaş imicinin möhkəmləndiyini göstərir. Dövlət başçısı son 20 ildə energetika sahəsində əldə edilən nailiyyətlərə toxunaraq bildirdi ki, ölkədə yaradılan generasiya gücləri əvvəlki bütün dövrlərlə müqayisədə təxminən üç dəfə artıb. Bu gün Azərbaycanın ümumi generasiya gücü 10 min meqavat civarındadır və bu göstərici enerji təhlükəsizliyinin tam təmin edildiyini göstərir. Eyni zamanda, bərpaolunan enerji layihələrinin artması ixrac potensialını da genişləndirir. Prezident İlham Əliyev bərpaolunan enerji layihələrinin coğrafiyasının genişləndiyini xüsusi vurğuladı. Qaradağ, Xızı, Abşeron, Biləsuvar, Neftçala, Naxçıvan və işğaldan azad edilmiş ərazilərdə həyata keçirilən layihələr ölkənin bütün regionlarını əhatə edən vahid enerji strategiyasının mövcudluğunu təsdiqləyir. Xüsusilə Qarabağ və Şərqi Zəngəzurda inşa edilən kiçik su elektrik stansiyaları "yaşıl zona" konsepsiyasının uğurla icra olunduğunu göstərir. Çıxışda investisiya iqlimi və maliyyə sabitliyi məsələləri də ön plana çəkildi. Prezident İlham Əliyev qeyd etdi ki, Azərbaycanın kredit reytinqinin artırılması beynəlxalq maliyyə institutlarının ölkəmizə olan etimadının göstəricisidir. Xarici borcun aşağı səviyyədə olması, valyuta ehtiyatlarının yüksəkliyi və siyasi sabitlik Azərbaycanı regionun ən cəlbedici investisiya məkanlarından birinə çevirir. Dövlət başçısı gələcək planlardan danışaraq bildirdi ki, 2030-cu ilə qədər 6 giqavat, 2032-ci ilə qədər isə 8 giqavat gücündə külək və Günəş elektrik stansiyalarının inşası nəzərdə tutulur. Bununla yanaşı, Batareya Enerji Saxlanc Sistemlərinin yaradılması bərpaolunan enerjinin dayanıqlı istifadəsini təmin edəcək. Bu, Azərbaycan energetikasında keyfiyyətcə yeni mərhələnin başlanğıcıdır. Prezident İlham Əliyev çıxışını yekunlaşdıraraq vurğuladı ki, Azərbaycan verdiyi sözə sadiq, müqavilələrinə hörmət edən etibarlı dövlətdir. Enerji sahəsində həyata keçirilən bütün layihələr ölkənin beynəlxalq nüfuzunu daha da gücləndirir. "Xızı-Abşeron" Külək Elektrik Stansiyasının açılışı isə Azərbaycanın yaşıl gələcəyə doğru inamla irəlilədiyini bir daha sübut edir".

Telegramda izləyin