"Trampın bu çıxışı bir neçə vacib aspekti özündə birləşdirir" - AÇIQLAMA

"Trampın bu çıxışı bir neçə vacib aspekti özündə birləşdirir. Prezident İranda etirazçıların öldürülməsinə qarşı hərbi zərbələr də daxil olmaqla müxtəlif variantları nəzərdən keçirməkdədir. Tramp daha əvvəl bildirmişdi ki, əgər İran dinc etirazçıları öldürərsə, ABŞ onların köməyinə gələcək".

Bunu Sonxeber.az-a politoloq Tural İsmayılov danışıb.

O, açıqlamasında qeyd edib ki, bu çıxışın arxasında bir neçə məqsəd dayanır:

"Birincisi, prezident İranda iqtisadi böhrandan başlayan və sonradan hakimiyyətə meydan oxumağa çevrilən etirazlara açıq dəstək verir. İnsan haqları təşkilatları bildirir ki, iki həftəlik etirazlar zamanı ən azı 538 nəfər həlak olub. İkincisi, Tramp İran rejiminə təzyiq göstərərək etirazçılara qarşı zorakılıqdan çəkinməsini tələb edir.

Eyni zamanda, bu ifadələr çox risklidir. İran parlamentinin sədri bildirib ki, ABŞ-ın müdaxiləsi olduğu təqdirdə regiondakı bütün Amerika bazaları və qüvvələri qanuni hədəf olacaq. Bəzi amerikalı siyasətçilər də narahatlıqlarını ifadə edirlər. Senator Tim Keyn hesab edir ki, hazırda İrana hərbi müdaxilə böyük səhv olar və bu, rejimə öz uğursuzluqlarını ABŞ-ın üzərinə atmaq imkanı verər.

Trampın bu ritorikası həm etirazçılara psixoloji dəstək, həm də İran rəhbərliyinə xəbərdarlıq rolunu oynayır, lakin hər hansı konkret hərbi əməliyyatın həyata keçiriləcəyinə dair aydınlıq yoxdur".

Telegramda izləyin