Sevgilisi tərəfindən öldürülən modelin qəbrindən başını kəsib oğurlayıblar

Üç il əvvəl keçmiş sevgilisi tərəfindən qətlə yetirilən 29 yaşlı italiyalı model Pamela Genininin məzarı açılıb, meyitin başı kəsilərək oğurlanıb.

Sonxeber.az xarici mediaya istinadən xəbər verir ki, hadisə İtaliyanın Berqamo vilayətində yerləşən Strozza qəbiristanlığında baş verib. 23 mart 2026-cı ildə Genini-nin nəşinin müvəqqəti məzardan ailə qəbiristanlığına köçürülməsi zamanı əməkdaşlar tabutda müdaxilə izləri aşkar ediblər. Aparılan yoxlama zamanı tabutun vintlərinin söküldüyü, meyitin başının kəsilərək götürüldüyü və izləri gizlətmək üçün tabutun yenidən silikonla bağlandığı məlum olub.

Berqamo prokurorluğunun başladığı istintaq çərçivəsində müəyyən edilib ki, ağır beton örtüyün qaldırılması və əməliyyatın gizli şəkildə həyata keçirilməsi bu cinayətin ən azı 3-4 nəfər tərəfindən törədildiyini göstərir. Şübhəlilərin iz qoymamaq üçün məzarı əvvəlki vəziyyətinə qaytarmağa çalışdığı, lakin boş qalan vint və düzgün hizalanmayan qapaq səbəbilə ifşa olunduqları bildirilib.

Qeyd edək ki, Pamela Genini 2025-ci ilin oktyabrında Milandakı mənzilində onu aylarla təqib edən 52 yaşlı keçmiş sevgilisi Gianluca Soncin tərəfindən bıçaqlanaraq öldürülmüşdü. Hazırda Soncin həbsdədir və məhkəmə prosesini gözləyir. Hüquq-mühafizə orqanları qəbiristanlıq ərazisindəki təhlükəsizlik kameralarını və ailənin daha əvvəl aldığı təhdidləri araşdırır.

İtaliya hüquq-mühafizə orqanları hadisə ilə bağlı "meyitə hörmətsizlik və oğurluq" maddələri üzrə 7 ilədək həbs cəzası nəzərdə tutulan istintaqı davam etdirir. Baş verənlər Genini-nin ailəsində böyük sarsıntıya səbəb olub, ölkədə isə qəbiristanlıqlarda təhlükəsizlik tədbirlərinin gücləndirilməsi ilə bağlı çağırışlar artıb.

Telegramda izləyin