İki gənc qız oğlana görə bir-birini bıçaqlayıb - VİDEO

Sevgi mübahisəsi qanlı bitdi: iki gənc qız bir-birini bıçaqladı

Türkiyənin İnegöl rayonunda iki gənc qız arasında baş verən mübahisə qanlı insidentlə nəticələnib.

Sonxeber.az xarici mediaya istinadən xəbər verir ki, hadisə gecə saat 22:00 radələrində Orhaniyə küçəsində baş verib. İddialara əsasən, 19 yaşlı Cankız Ç. aşiq olduğu A.M. (25) adlı şəxsin sevgilisi olan 17 yaşlı Sinem Y.-ni danışmaq üçün görüşə çağırıb. Görüş zamanı tərəflər arasında başlayan mübahisə qısa zamanda davaya çevrilib.

Baş verən dava zamanı hər iki gənc qız bir-birinə bıçaqla xəsarət yetirib. Hadisədən sonra Cankız Ç. yaralı halda ərazidən uzaqlaşıb. Ayağından bıçaqlanan Sinem Y. isə yaxınlıqdakı köşkə sığınaraq kömək gözləyib.

Hadisə yerinə çağırılan təcili tibbi yardım və polis əməkdaşları yaralını xəstəxanaya çatdırıblar. Sinem Y. dövlət xəstəxanasına yerləşdirilib. Qaçan digər yaralı isə təxminən 5 kilometr aralıda tapılaraq polis əməkdaşları tərəfindən özəl xəstəxanaya aparılıb.

Hadisə zamanı yaralının anasının emosional reaksiyası da diqqət çəkib. O, xəstəxanaya gətirilən qızına narahatlıqla səslənərək vəziyyətini soruşub. Yaralı qız isə anasına sakit olmasını istəyərək reaksiya verib.

Digər tərəf - Cankız Ç. müalicəsi başa çatdıqdan sonra polis tərəfindən saxlanılıb. Faktla bağlı araşdırma aparılır.

Telegramda izləyin