Uşağı abort etdirmədiyi üçün sevgilsinin öldürən bələdiyyə sədri hətşeyi etiraf etdi - VİDEO

Adanada göldə tapılan qadının qətlinin təfərrüatları üzə çıxdı

Türkiyənin Adana vilayətində göldə tapılan qadın meyiti ilə bağlı aparılan istintaq dəhşətli cinayətin üstünü açıb.

Sonxeber.az türk mediasına istinadən xəbər verir ki, hadisənin təfərrüatları ictimaiyyətdə ciddi rezonans doğurub.

Adananın Tufanbəyli rayonunda yerləşən Kürebeli gölündə meyiti aşkarlanan 27 yaşlı, bir uşaq anası Bahar Aksütün qətlə yetirildiyi müəyyən olunub. Araşdırmalar zamanı məlum olub ki, qadın yaşadığı ərazinin bələdiyyə sədri , 44 yaşlı Mustafa Arıkan tərəfindən bıçaqlanaraq öldürülüb.

Hadisə 5 aprel tarixində çobanların göldə hərəkətsiz qadın cəsədi görərək jandarmaya məlumat verməsi ilə üzə çıxıb. Əraziyə cəlb olunan hüquq-mühafizə orqanlarının əməkdaşları meyiti müayinə etdikdən sonra onun zorakılıq nəticəsində öldürüldüyünü müəyyən ediblər. Meyit Adana Məhkəmə Tibbi Ekspertiza Mərkəzinə təhvil verilib.

Aparılan araşdırmalar nəticəsində cəsədin 9 gün əvvəl itkin düşən Bahar Aksütə aid olduğu təsdiqlənib. Əslən Ərzincandan olan Aksütün Tufanbəylidə bir pivəxanada ofisiant kimi çalışdığı bildirilib. Ekspertiza zamanı onun hamilə olduğu və bədəninə 8 bıçaq zərbəsi vurulduğu məlum olub.

İstintaq çərçivəsində qadının ərazinin bələdiyyə sədri Mustafa Arıkanla münasibətdə olduğu üzə çıxıb. Məlumata görə, Aksüt Arıkandan hamilə qalıb və kişi ondan uşağı abort etdirməsini tələb edib. Qadın bu tələbi qəbul etmədikdə isə aralarında mübahisə yaranıb.

Saxlanılan Mustafa Arıkan ifadəsində cinayəti etiraf edərək bildirib ki, hadisə günü Bahar Aksütü göl ərazisinə aparıb, abort etdirməsi üçün təzyiq göstərib. Qadın razılaşmadıqda isə onu bıçaqlayaraq qətlə yetirib və meyiti gölə atıb.

Arıkan həmçinin qeyd edib ki, hadisədən əvvəl Bahar Aksüt və onun rəfiqəsini Kahramanmaraşın Elbistan rayonundan Tufanbəyliyə gətirib. Onun sözlərinə görə, cinayət baş verən zaman dostları Vural Ö. və Kader K. hadisə yerində olmayıblar.

Polis Arıkanın ifadəsi əsasında adı çəkilən şəxsləri də saxlayıb. Onlar cinayətdən sonradan xəbər tutduqlarını bildiriblər. Məhkəmənin qərarı ilə Mustafa Arıkan qətl, digər iki şəxs isə cinayətə yardım etməkdə ittiham olunaraq həbs ediliblər.

Faktla bağlı araşdırmalar davam etdirilir.

Telegramda izləyin