16 yaşlı uşaq yaşıdları tərəfindən dəmir dəyənəklərlə döyüldü - VİDEO

İstanbulun Bayrampaşa rayonunda 16 yaşlı yeniyetmənin küçənin ortasında dəmir dəyənəklərlə amansız şəkildə döyülməsi ilə bağlı dəhşətli hadisə baş verib.

Sonxeber.az türk mediasına istinadən xəbər verir ki, hadisə dünən Bayrampaşanın Yıldırım Mahallesi ərazisində qeydə alınıb. İddialara görə, əvvəllər "yan baxma" səbəbindən aralarında ədavət olan E.C.B. (20) və K.T.S. (17) ilə M.M. (16) küçədə qarşılaşıb. Aralarında başlayan mübahisə qısa müddətdə davaya çevrilib.

Dava zamanı E.C.B. və K.T.S. 16 yaşlı M.M.-ni dəmir dəyənəklərlə döyərək ağır yaralayıb. Ətrafdakı vətəndaşların məlumatı əsasında hadisə yerinə polis və təcili tibbi yardım briqadaları cəlb olunub. Yaralı yeniyetmə xəstəxanaya çatdırılıb, iki şübhəli isə saxlanılıb.

Araşdırmalar zamanı məlum olub ki, şübhəlilər yeniyetməni döydükləri anları sosial şəbəkə hesablarında paylaşıblar.

Saxlanılan şəxslər polis bölməsində aparılan istintaq proseslərindən sonra "qəsdən adam öldürməyə cəhd" maddəsi ilə həbs edilərək istintaq təcridxanasına göndəriliblər.

Telegramda izləyin