Lyuks avtomobili ölən sahibi ilə birlikdə basdırdılar - VİDEO

Çində baş verən qeyri-adi dəfn mərasimi həm yerli, həm də beynəlxalq ictimaiyyətdə geniş rezonans doğurub.

Sonxeber.az xarici mediaya istinadən xəbər verir ki, hadisə Liaoyang şəhərində qeydə alınıb və qısa müddətdə sosial şəbəkələrdə yayılıb. Çin mediasında yer alan görüntülərdə "8888" nömrə nişanlı 20 milyonluq qara rəngli Mercedes-Benz S450L markalı avtomobilin məzarın yanına endirilərək dəfn edildiyi əks olunub.

Kadrlardan aydın olur ki, sözügedən lüks avtomobil dəfn mərasiminin bir hissəsi kimi torpağa verilib. Bildirilir ki, bu cür hallar Çinin bəzi bölgələrində mövcud olan qədim inanclarla əlaqəlidir. Həmin inanclara görə, dünyasını dəyişən şəxslərin qiymətli əşyalarla birlikdə dəfn olunması "son borc" kimi qəbul edilir.

Ekskavatorla qazılan məzar sahəsinə endirilən avtomobilin üzərinə qırmızı örtük salınaraq mərasimlə torpağa gömülməsi diqqət çəkib. Görüntülərin yayılması ilə hadisə sosial mediada geniş müzakirələrə səbəb olub.

Avtomobildəki "8888" nömrə nişanı isə ən çox müzakirə olunan detallardan biri olub. Çin mədəniyyətində "8" rəqəmi var-dövlət və rifah rəmzi sayılır və bu cür nömrələrin yüksək maddi dəyərə malik olduğu bilinir.

Hadisə cəmiyyətdə birmənalı qarşılanmayıb. Bəzi şəxslər bunu köklü ənənələrin bir hissəsi kimi qiymətləndirsə də, digərləri bu addımı israfçılıq və nümayiş kimi dəyərləndirib.

Hadisədən sonra Liaoyang şəhərinin yerli mülki işlər orqanları araşdırmaya başladığını açıqlayıb. Rəsmilər bu cür tətbiqlərin müasir dövrdə təşviq olunmadığını və "uyğunsuz davranış" kimi qiymətləndirilə biləcəyini bildiriblər.

Telegramda izləyin