Yolda yeriyərkən başına balkondan heykəl düşən qadın həyatını itirib

Paris şəhərində fəaliyyət göstərən məşhur moda brendi Prada mağazasının müdiri, 30 yaşlı Chiara Jaconisin faciəvi ölümü ilə bağlı istintaq yeni mərhələyə qədəm qoyub.

Sonxeber.az xarici mediaya istinadən xəbər verir ki, hadisə ötən ilin sentyabrında Napoli şəhərində baş verib. Doğum gününü qeyd etmək üçün sevgilisi ilə birlikdə şəhərin Quartieri Spagnoli ərazisində gəzintidə olan Jaconis balkonlardan birindən atılan təxminən 2 kiloqramlıq heykəlin başına dəyməsi nəticəsində ağır xəsarət alıb. Xəstəxanaya çatdırılsa da, o, iki gün sonra beyin travmasından həyatını itirib.

Araşdırmalar nəticəsində məlum olub ki, hadisəyə səbəb olan 13 yaşlı uşaq yaşına görə cinayət məsuliyyətinə cəlb olunmayıb. Lakin prokurorluq uşağın valideynlərini səhlənkarlıq və nəzarət vəzifəsini yerinə yetirməməkdə ittiham edərək məhkəməyə verilməsini tələb edib. Bildirilir ki, uşaq daha əvvəl də oxşar təhlükəli hərəkətlər edib, lakin ailə tərəfindən qarşısı alınmayıb.

Valideynlər ittihamları qəbul etmir və hadisə ilə əlaqələrinin olmadığını bildirirlər. Məhkəmənin bu işi icraata götürüb-götürməyəcəyi yaxın vaxtlarda keçiriləcək ilkin dinləmədə müəyyənləşəcək.

Bu hadisə böyük şəhərlərdə təhlükəsizlik və valideyn məsuliyyəti məsələlərini yenidən gündəmə gətirib.

Telegramda izləyin