"Bakı Enerji Həftəsi yalnız enerji sektorunun deyil, bütövlükdə iqtisadiyyatın inkişafına xidmət edir" - DEPUTAT

"Bu il Azərbaycanın iqtisadi və enerji tarixində mühüm əhəmiyyət daşıyan hadisələrdən biri - Xəzər Neft və Qaz Sərgisinin 30 illiyi qeyd olunur. 1994-cü ildə təşkil edilən ilk sərgi müstəqil Azərbaycanın beynəlxalq iqtisadi sistemə inteqrasiyası, xarici investisiyaların cəlbi və enerji sektorunun inkişafı baxımından mühüm mərhələnin başlanğıcı olmuşdur.
Təsadüfi deyil ki, həmin dövr Azərbaycanın ümummilli lideri Heydər Əliyevin rəhbərliyi altında həyata keçirilən yeni neft strategiyası ilə üst-üstə düşürdü. Məhz həmin siyasətin nəticəsində Azərbaycan qlobal enerji bazarının etibarlı iştirakçısına çevrildi, ölkəyə milyardlarla dollar investisiya cəlb olundu və enerji sektorunun inkişafı iqtisadi yüksəlişin əsas hərəkətverici qüvvəsi oldu", - bunları Sonxeber.az -a danışan deputat Azər Badamov deyib:

"Bu gün isə artıq söhbət yalnız bir sərgidən getmir. Xəzər Neft və Qaz Sərgisi 30 il ərzində böyük inkişaf yolu keçərək Bakı Enerji Həftəsi formatına yüksəlib. Bu platforma enerji şirkətlərini, investorları, maliyyə institutlarını, dövlət rəsmilərini və beynəlxalq təşkilatları bir araya gətirən qlobal iqtisadi əməkdaşlıq məkanına çevrilib.
Bakı Enerji Həftəsinin beynəlxalq nüfuzunun göstəricilərindən biri də dünyanın aparıcı dövlət rəhbərlərinin tədbirə göstərdiyi diqqətdir. ABŞ Prezidenti Donald Trampın, Türkiyə Prezidenti Rəcəb Tayyib Ərdoğanın və Böyük Britaniyanın Baş naziri Kir Starmerin tədbir iştirakçılarına ünvanladıqları rəsmi məktublar Azərbaycanın enerji siyasətinə və ölkəmizin beynəlxalq enerji təhlükəsizliyində oynadığı rola verilən yüksək qiymətin göstəricisidir.
Bu gün dünya enerji bazarlarında mürəkkəb geosiyasi proseslər yaşanır. Enerji təhlükəsizliyi artıq iqtisadi təhlükəsizliyin ayrılmaz hissəsinə çevrilib. Belə bir şəraitdə Azərbaycan özünü etibarlı tərəfdaş kimi təsdiqləyib. Avropanın enerji təchizatının şaxələndirilməsi siyasətində ölkəmiz mühüm rol oynayır və Azərbaycan qazı bir sıra dövlətlərin enerji təhlükəsizliyinin təmin edilməsində strateji əhəmiyyət daşıyır.
Eyni zamanda Bakı Enerji Həftəsi yalnız enerji sektorunun deyil, bütövlükdə iqtisadiyyatın inkişafına xidmət edir. Burada əldə olunan razılaşmalar, keçirilən biznes forumlar və B2B görüşlər yeni investisiyaların cəlb olunmasına, texnologiya transferinə, innovasiyaların tətbiqinə və sahibkarlıq fəaliyyətinin genişlənməsinə imkan yaradır.
Xüsusilə diqqət çəkən məqamlardan biri ondan ibarətdir ki, Azərbaycan artıq ənənəvi enerji istehsalçısı olmaqla yanaşı, yaşıl enerji sahəsində də regional liderliyə iddialıdır. Qarabağ və Şərqi Zəngəzur yaşıl enerji zonası elan olunub, Xəzər dənizinin nəhəng külək enerjisi potensialının reallaşdırılması istiqamətində mühüm layihələr həyata keçirilir. Bu isə Bakı Enerji Həftəsinin gündəliyini daha da zənginləşdirir və tədbiri gələcəyin enerji platformasına çevirir.
Əslində, Bakı Enerji Həftəsinin 30 illik inkişaf yolu Azərbaycanın iqtisadi diplomatiyasının uğur hekayəsidir. Bu tədbir ölkəmizin investisiya cəlbediciliyinin, beynəlxalq tərəfdaşlıqlarının və enerji siyasətinin effektivliyinin göstəricisidir. Bu gün Bakı artıq yalnız enerji istehsalçılarının deyil, həm də enerji siyasətini müəyyənləşdirən mühüm qlobal platformalardan birinə ev sahibliyi edir.
Hesab edirəm ki, Bakı Enerji Həftəsinin növbəti illərdə də inkişafı Azərbaycanın beynəlxalq iqtisadi mövqeyinin güclənməsinə, yeni investisiyaların cəlb olunmasına və ölkəmizin qlobal enerji təhlükəsizliyində rolunun daha da artmasına mühüm töhfə verəcəkdir".

Telegramda izləyin