Uzaqlaşdırma qərarına baxmayaraq evə gəldi, həyat yoldaşını uşaqlarının gözü qarşısında bıçaqladı - VİDEO

Türkiyənin Konya şəhərində ayrılıq mərhələsində olan qadın həyat yoldaşının bıçaqlı hücumuna məruz qalıb.

Sonxeber.az xarici mediaya istinadla xəbər verir ki, hadisə Selçuklu rayonunun Akıncılar məhəlləsində baş verib. Məlumata görə, suriyalı İbrahim El Fidyen barəsində məhkəmə tərəfindən uzaqlaşdırma qərarı çıxarılsa da, o, həyat yoldaşı Emine El Musanın yaşadığı evə gəlib.

Tərəflər arasında yaranan mübahisə qısa zamanda davaya çevrilib. Bu zaman İbrahim El Fidyen uşaqlarının gözü qarşısında həyat yoldaşını boyun nahiyəsindən bıçaqlayıb. Ağır yaralanan qadın qan içində yerə yıxılıb, şübhəli isə hadisə yerindən qaçıb.

Uşaqların qışqırığını eşidən qonşular təcili yardım və polisə məlumat veriblər. Hadisə yerinə gələn həkimlər yaralı qadına ilkin yardım göstərdikdən sonra onu xəstəxanaya çatdırıblar.

Polis qaçan şübhəlinin saxlanılması istiqamətində əməliyyat-axtarış tədbirlərini davam etdirir. Faktla bağlı araşdırma aparılır.

Telegramda izləyin