Soyuducunun buzunu bir neçə dəqiqəyə belə əridin

Dondurucu kameranın əridilməsi bir çox insan üçün ən xoşagəlməz ev işlərindən biri hesab olunur. Buz saatlarla əriyir, su mətbəxə yayılır və bütün proses çox vaxt və enerji aparır. Lakin təcrübəli evdar qadınlar artıq uzun illərdir ki, bıçaqdan, buz qırmaqdan və texnikaya zərər vermək riskindən uzaq olan sadə üsuldan istifadə edirlər.

Lent.az xarici mediaya istinadən xəbər verir ki, evdar qadınlar çox isti su ilə dolu qazan və ya qabdan istifadə etməyi məsləhət görürlər. Dondurucu söndürüldükdən sonra içərisinə qaynar su qabı yerləşdirilir və qapı dərhal bağlanır.

İsti buxar buzun sürətlə əriməsinə kömək edir və hətta qalın buz təbəqələri də divarlardan daha tez ayrılır. Bir çox hallarda iri buz parçaları cəmi bir neçə dəqiqə ərzində öz-özünə qopub düşür.

Mütəxəssislər bildirirlər ki, buzun mexaniki şəkildə təmizlənməsi dondurucuların sıradan çıxmasının ən geniş yayılmış səbəblərindən biridir. Bıçaq və ya digər metal əşyalar daxili divarları və soyuducu maye keçən boruları zədələyə bilər.

Tam əridildikdən sonra bəzi evdar qadınlar təmiz divarlara nazik qat qliserin çəkirlər - bu üsul buzun daha gec yaranmasına kömək edir.

Telegramda izləyin