Göz yaşları niyə duzludur? - CAVAB

Mütəxəssislər insan göz yaşlarının niyə duzlu dada malik olduğunu və bəzi hallarda niyə daha qatı görünərək gözlərdə və dəridə qıcıqlanmaya səbəb ola bildiyini izah ediblər.

Lent.az xarici mediaya istinadən xəbər verir ki, ekspertlərin sözlərinə görə, göz yaşları əsasən sudan ibarət olsa da, onların tərkibində müxtəlif mineral maddələr, xüsusilə də natrium xlorid, yəni adi xörək duzu mövcuddur.

Göz yaşlarına xarakterik duzlu dad verən əsas komponent də məhz budur. Mütəxəssislər bildirirlər ki, göz yaşı mayesindəki duzun konsentrasiyası orqanizmdəki digər mayelərdə, o cümlədən qanda və tüpürcəkdə olan səviyyəyə yaxındır. Normal şəraitdə bu göstərici narahatlıq yaradacaq qədər yüksək olmur.

Göz yaşlarının tərkibində duzdan əlavə başqa vacib maddələr də mövcuddur. Bunlardan biri bakteriyalara qarşı qoruyucu təsir göstərən və gözün selikli qişasının təbii müdafiəsini dəstəkləyən lizozim fermentidir.

Alimlər xatırladırlar ki, göz yaşları tərkibinə və funksiyasına görə fərqlənir. Bazal göz yaşları göz səthini daim nəmləndirir, reflektor göz yaşları qıcıqlandırıcı maddələrin gözdən təmizlənməsinə kömək edir, emosional göz yaşları isə güclü hisslər və psixoloji reaksiyalar nəticəsində yaranır.

Məhz emosional göz yaşları bəzi hallarda daha duzlu və hətta azacıq acımtıl hiss oluna bilər. Bunun səbəbi orqanizmin stressə reaksiyasıdır. Güclü emosional vəziyyət zamanı ürək döyüntüsü sürətlənir, adrenalin də daxil olmaqla müxtəlif hormonların səviyyəsi artır ki, bu da göz yaşı mayesinin kimyəvi tərkibində müvəqqəti dəyişikliklər yarada bilər.

Mütəxəssislərin fikrincə, güclü emosional sarsıntılar zamanı göz yaşları həqiqətən daha konsentrasiyalı ola bilər. Bəzi hallarda bu vəziyyət gözlərdə və üz dərisində yüngül qıcıqlanma yaradır.

Ekspertlər vurğulayırlar ki, bu cür reaksiya orqanizmin emosional gərginliyə verdiyi təbii cavabın bir hissəsidir. Buna görə də insan güclü ağlama zamanı yalnız göz yaşlarının duzlu dadını deyil, həm də yanma hissi və müəyyən narahatlıq yaşaya bilər.

Telegramda izləyin