Çin kosmos yarışında yeni mərhələyə keçir - FOTO

Çin 2030-cu illərin ortalarınadək Tsinxay əyalətində, hazırda Yer kürəsinin ən güclü optik teleskoplarından birinin tikildiyi Sayşiten dağının zirvəsində dünyanın ən böyük astronomiya mərkəzini yaratmağı planlaşdırır.

Oxu.Az bu barədə "South China Morning Post" (SCMP) nəşrinə istinadən xəbər verir.

Pekində yerləşən Çin Milli Astronomiya Rəsədxanalarının (NAOC) sahə planlaşdırılması üzrə baş elmi rəhbəri Den Litsay bildirib ki, burada diametri 6,5 metrdən 14,5 metrədək olan teleskoplar, eləcə də onlarla daha kiçik müşahidə aparatı fəaliyyət göstərəcək.

"Onların ümumi işıq toplama qabiliyyətinin Havay adalarındakı Mauna-Kea zirvəsində yerləşən teleskopların imkanlarını üstələyəcəyi gözlənilir", - deyə o qeyd edib.

Litsayın sözlərinə görə, dəyəri 2,5 milyard yuan (təxminən 369 milyon dollar) olan 14,5 metrlik Böyük Optik Teleskop (LOT) və 6,5 metrlik çoxobyektli araşdırma teleskopu (MUST) üçün artıq ərazinin hazırlanması, güzgülərin cilalanması və avadanlıqların işlənib hazırlanması prosesinə başlanılıb.

Hər iki teleskopun 2030-cu ilə qədər istismara verilməsi planlaşdırılır.

Telegramda izləyin