İbizada çılpaq turist 7-ci mərtəbədən yıxıldı, vəziyyəti ağırdır

İspaniyanın İbiza adasında 29 yaşlı Kolumbiya vətəndaşı olan turist 7-ci mərtəbənin eyvanından yıxılaraq ağır xəsarətlər alıb. Hadisə San Antonio bölgəsində yerləşən yaşayış binasında baş verib.

Sonxeber.az xarici mediaya istinadla xəbər verir ki, çılpaq vəziyyətdə olan turist eyvanın kənarında asılı qalıb və yuxarı qalxmağa çalışsa da, tarazlığını itirərək təxminən 30 metr hündürlükdən beton səthə düşüb. Hadisə ətrafdakı şəxslər arasında böyük təşvişə səbəb olub.

Ağır yaralanan şəxs təcili olaraq xəstəxanaya çatdırılıb. Həkimlər onun çanaq sümüyündə sınıqlar, döş qəfəsi travması və ciddi beyin zədəsi aldığını bildirib. Hazırda turist reanimasiya şöbəsində müalicə olunur və vəziyyəti kritik qiymətləndirilir.

Hadisə ilə bağlı araşdırma aparılır. Mülki Qvardiya əməkdaşları turistin yıxılmadan əvvəlki anlarını əks etdirən təhlükəsizlik kamerası görüntülərini incələyir.

Qeyd edək ki, son günlər İbizada hündürlükdən yıxılma ilə bağlı bir neçə oxşar hadisə qeydə alınıb. Yerli hakimiyyət orqanları turistləri alkoqol və narkotik vasitələrin təsiri altında təhlükəli davranışlardan çəkinməyə çağırıb.

Telegramda izləyin