Apple 4 məşhur cihazı "istefaya" göndərir

Apple şirkəti kompüter xəttində Intel dövrünü faktiki olaraq başa çatdırıb. Şirkətin yeni macOS 27 Golden Gate əməliyyat sistemi yalnız Apple Silicon çipləri ilə təchiz edilmiş kompüterlər üçün əlçatan olacaq.

Lent.az xarici mediaya istinadla xəbər verir ki, bu qərar son illərin ən böyük texnoloji dəyişikliklərindən biri hesab olunur.

Apple Intel prosessorlu bütün Mac modellərinə dəstəyi sakit şəkildə dayandırıb. Nəticədə, milyonlarla istifadəçi köhnə cihazlarında yeni əməliyyat sistemini quraşdıra bilməyəcək.

Yeniləmə dəstəyi dayandırılan son Intel əsaslı Mac modelləri bunlardır: MacBook Pro 16 (2019), MacBook Pro 13 (2020), iMac 27 (2020), Mac Pro (2019).

Bu cihazlar üçün Intel dəstəyi təqdim edən son əməliyyat sistemi macOS 26 Tahoe olacaq.

Məlumata görə, Apple bununla 2020-ci ildə başladığı Intel prosessorlarından öz istehsalı olan çiplərə keçid prosesini tamamlamağa yaxınlaşır. Şirkətin gələcək əməliyyat sistemləri yalnız M1 və daha yeni Apple Silicon çipləri ilə işləyən Mac kompüterlərində istifadəyə veriləcək.

Mütəxəssislər bildirirlər ki, Intel əsaslı Mac modelləri bir müddət təhlükəsizlik yeniləmələri almağa davam etsə də, zaman keçdikcə yeni funksiyalara və bəzi proqram təminatlarına çıxış imkanlarını itirəcəklər. Bu cihazlar tədricən istifadə müddətinin sonu mərhələsinə keçəcək.

Telegramda izləyin