Dünyanın ilk trilyonçusu oldu - Nə qədər pulu var?

"SpaceX"in cümə axşamı keçirdiyi ilkin kütləvi səhmləşmə (IPO) nəticəsində 75 milyard dollar vəsait cəlb etməsi "Tesla" və "SpaceX" rəhbəri İlon Maskın sərvətini 1,1 trilyon dollardan yuxarı qaldırıb. Bununla da Mask tarixdə sərvəti 1 trilyon dolları aşan ilk insan olub.

Qaynarinfo "Reuters"ə istinadən xəbər verir ki, raket, peyk və süni intellekt sahələrində fəaliyyət göstərən "SpaceX"in rekord göstəricili IPO-su investorlar tərəfindən böyük maraqla qarşılanıb və şirkət 75 milyard dollar maliyyə vəsaiti toplayıb. Bu nəticə Maskın şəxsi sərvətini yeni rekord həddə çatdırıb.

"Forbes"un IPO-dan əvvəlki hesablamalarına əsasən, İlon Maskın sərvəti təxminən 780 milyard dollar idi. Şirkətin səhmlərinin birjada ticarətə başlamasından sonra isə onun xalis sərvəti 1,1 trilyon dolları ötüb.

Sərvətin böyük hissəsi "SpaceX"dən gəlir

Hazırda 54 yaşlı Maskın sərvətinin əsas hissəsi "SpaceX"dəki paylarından formalaşır. Onun şirkətdəki səhmlərinin dəyərinin təxminən 866 milyard dollar olduğu bildirilir.

"Tesla" səhmləri və digər investisiyalar da nəzərə alındıqda, Maskın ümumi sərvəti 1,1 trilyon dolları keçir. Bu göstərici onu dünyanın ən varlı şəxsi mövqeyinə yüksəldir və ən yaxın rəqibləri ilə arasındakı fərqi daha da artırır.

"Forbes"un sərvət üzrə redaktor müavini Mett Durot bildirib: "Dünyanın ikinci ən varlı insanının sərvəti təxminən 300 milyard dollar səviyyəsindədir. Maskın çatdığı göstərici bundan üç dəfədən də çoxdur".

"İlon Mask mükafatı" müzakirələri

Analitiklər hesab edirlər ki, "SpaceX"in əldə etdiyi nəhəng bazar dəyəri yalnız şirkətin maliyyə göstəriciləri ilə izah oluna bilməz.

Son illərdə maliyyə bazarlarında formalaşan və "İlon Mask mükafatı" adlandırılan anlayış investorların İlon Maskın vizyonuna olan inamı səbəbindən şirkətlərin ənənəvi qiymətləndirmə meyarlarından daha yüksək dəyərləndirilməsini ifadə edir.

"Renaissance Capital"ın baş strateqi Mett Kennedi qeyd edib: "Necə ki, "Tesla"da, "SpaceX"də də investorlar böyük ölçüdə İlon Maska sərmayə qoyurlar. 1,5-2 trilyon dollarlıq bazar dəyəri ənənəvi qiymətləndirmə metodlarını arxa plana keçirir və bunu ən uyğun şəkildə "İlon Mask mükafatı" kimi xarakterizə etmək olar".

İş dünyasının ən mübahisəli simalarından biri

İlon Maskın sürətli yüksəlişi şirkət idarəçiliyi, maraqların toqquşması və siyasi təsiri ilə bağlı müzakirələri də gündəmə gətirib.

Mask 2022-ci ildə "Twitter"i 44 milyard dollara satın alaraq sosial media sektoruna daxil olub və yüz milyonlarla istifadəçiyə birbaşa çıxış imkanı əldə edib. O, miqrasiya siyasətindən dövlət xərclərinə qədər müxtəlif mövzulardakı açıqlamaları ilə tez-tez diqqət mərkəzində olub.

ABŞ Prezidenti Donald Tramp administrasiyasında ötən il üzərinə götürdüyü vəzifə də onun ən çox müzakirə olunan addımlarından biri sayılır. Lakin Mask və Tramp arasında əvvəl mövcud olan yaxın münasibətlər sonradan siyasət və dövlət xərcləri ilə bağlı fikir ayrılıqları səbəbindən açıq qarşıdurmaya çevrilib.

Telegramda izləyin