Göyərtini bir həftədən çox təzə saxlamağın yolu

Yay aylarında cəfəri, şüyüd və ya keşniş kimi göyərtiləri təzə saxlamaq bir çox evdar qadın üçün ciddi problemə çevrilir. Zərif quruluşa və yüksək nəm tərkibinə malik olduqları üçün təzə göyərtilər hətta soyuducuda saxlanıldıqda belə ikinci və ya üçüncü gündə solmağa və çürüməyə başlayır. Restoranlarda çalışan peşəkar aşpazlar isə göyərtinin uzun müddət təzə qalmasına kömək edən sadə üsuldan istifadə edirlər.

Lent.az bu üsulu təqdim edir:

Göyərtinin uzun müddət təzə qalması onun düzgün hazırlanmasından başlayır. Əvvəlcə göyərtini bir neçə dəqiqə soyuq su ilə doldurulmuş iri qaba yerləşdirin. Bu zaman qum və digər çirklər qabın dibinə çökəcək. Daha sonra göyərtini əllə ehtiyatla sudan çıxarın. Yuyulduqdan sonra artıq nəmin tamamilə aradan qaldırılması çox vacibdir. Bunun üçün xüsusi göyərti qurutma qurğusundan istifadə etmək olar. Belə bir vasitə yoxdursa, göyərtini yaxşıca silkələyib quru dəsmalın üzərinə sərmək kifayətdir. Yarpaqların üzərində su damcılarının qalmasına yol vermək olmaz. Çünki məhz bu damcılar çürüməyə səbəb olan bakteriyaların sürətlə çoxalması üçün əlverişli şərait yaradır.

Konteynerdə düzgün şərait yaratmaq

Qurudulmuş göyərtini kağız dəsmala bükün və onun üzərinə az miqdarda soyuq su çiləyin. Kağız dəsmal nəmli olmalı, lakin islanmamalıdır. Əgər ondan su damcılayırsa, məhsul tez xarab ola bilər. Sonra bu bağlamanı plastik qaba və ya dərin kasaya yerləşdirin. Qabın üzərini qida plyonkası ilə örtün və bıçaq və ya diş çöpü vasitəsilə plyonkada bir neçə kiçik dəlik açın. Bu dəliklər hava dövranını təmin edir, bitkilərin "nəfəs almasına" imkan yaradır və kondensatın yığılmasının qarşısını alır. Daha yaxşı nəticə əldə etmək üçün gündə bir dəfə qabı açaraq xarab olmağa başlayan yarpaqları ayırmaq məsləhət görülür.

Təzə göyərtini necə seçmək olar?

Göyərtinin uzun müddət saxlanılması üçün onun təzə olması əsas şərtdir. Buna görə də alış-veriş zamanı məhsulun görünüşünə diqqət yetirmək lazımdır. Yarpaqlar parlaq və vahid yaşıl rəngdə olmalı, üzərində saralmış hissələr, qurumuş uclar və ya tünd ləkələr olmamalıdır. Keyfiyyətli göyərti öz formasını qoruyur, solğun və cansız görünmür. Onun saplaqları elastik və möhkəm olur. Təzə göyərti xoş və təbii qoxuya malik olur. Əgər turşumuş və ya kif qoxusuna bənzər hər hansı qoxu hiss olunursa, bu, məhsulun daşınma və ya saxlanma şəraitinin düzgün olmadığını göstərə bilər. Bu sadə qaydalara əməl etməklə göyərtiləri bir həftədən daha uzun müddət təzə saxlamaq mümkündür.

Telegramda izləyin