Restoran sahibi ilə bağlı qalmaqal: yaşlı qadına zorakılıq iddiası - VİDEO

Ukraynanın Odessa şəhərində fəaliyyət göstərən türk restoranının sahibi olduğu bildirilən şəxsin 68 yaşlı qadını döyməsini əks etdirən görüntülər ictimaiyyət arasında ciddi narazılıq yaradıb.

Sonxeber.az xarici mediaya istinadən xəbər verir ki, hadisə restoranın yaxınlığında aparılan tikinti işləri ilə bağlı yaranan mübahisə zəminində baş verib. İddialara əsasən, yaşlı qadın tikinti sahəsindən gələn səs-küydən narazı qalaraq elektrik enerjisinin verilməsini dayandırıb. Bundan sonra restoran sahibinin qadına fiziki hücum etdiyi bildirilir.

Sosial şəbəkələrdə yayılan görüntülərdə kişinin yaşlı qadına yumruq vurduğu, onu yerə yıxdığı və saçından tutaraq sürüdüyü görünür.

Hadisədən sonra "Turkuaz" adlı restoranın fəaliyyəti dayandırılıb və obyekt möhürlənib. Odessa polisi faktla bağlı araşdırmalara başlayıb. Hüquq-mühafizə orqanları insidentin bütün təfərrüatlarını araşdırır.

Hadisə Ukrayna ictimaiyyətində geniş rezonans doğurub və sosial şəbəkələrdə zorakılığa görə məsul şəxsin cəzalandırılması ilə bağlı çağırışlar səsləndirilib.

Telegramda izləyin