Oyun başlamazdan əvvəl cadu etdilər? Dünya Çempionatında olay görüntü! - VİDEO

2026-cı il Dünya Çempionatının L qrupunda keçirilən Qana-Panama qarşılaşması təkcə nəticəsi ilə deyil, tribunalarda qeydə alınan görüntülərlə də gündəm olub.

Sonxeber.az xarici mediaya istinadla xəbər verir ki, Kanadanın Toronto şəhərində baş tutan oyunda Qana Panamanı 90+5-ci dəqiqədə Caleb Yirenkyinin vurduğu qolla 1:0 hesabı ilə məğlub edib. Son dəqiqə qolu Qana azarkeşləri arasında böyük sevincə səbəb olub.

Matç başlamazdan əvvəl tribunadakı bəzi qanalı azarkeşlərin əllərindəki tozabənzər maddəni havaya səpdiyi anlar televiziya kameralarına düşüb. Sosial şəbəkələrdə sürətlə yayılan görüntülər müxtəlif müzakirələrə yol açıb. Bir çox istifadəçi bunu mistik ritual və ya "böyü mərasimi" kimi qiymətləndirib.

Qananın qələbə qolunu matçın son saniyələrində vurması müzakirələri daha da artırıb. Sosial şəbəkələrdə bəzi istifadəçilər zarafatla həmin görüntülərlə son dəqiqə qolunu əlaqələndirərək müxtəlif paylaşımlar ediblər.

Qarşılaşmadan sonra həm Qananın dramatik qələbəsi, həm də tribunadakı maraqlı görüntülər Dünya Çempionatının ən çox danışılan hadisələri sırasında yer alıb.

Telegramda izləyin