Maşınında gözləyən qadını bıçaqla hədələyib qarət etdi

Türkiyənin Ankara şəhərində avtomobilində iş yoldaşını gözləyən qadın naməlum şəxs tərəfindən bıçaqla hədələnib.

Sonxeber.az xarici mediaya istinadla xəbər verir ki, hadisə səhər saat 06:00 radələrində Ankaranın Sincan rayonunun Yenikent məhəlləsində baş verib. Məlumata görə, Ş.Ö. adlı qadın avtomobilində iş yoldaşını gözlədiyi zaman M.Ç. adlı şəxs zorla maşına minib.

İddiaya əsasən, üzərində bıçaq olduğunu deyərək qadını hədələyən şübhəli ondan özünü Yenimahalle rayonunda yerləşən Ankaparkın avtodayanacağına aparmasını tələb edib. Qorxu və təşviş yaşayan qadın onun istəyini yerinə yetirib.

Şübhəli avtomobildən düşməzdən əvvəl qadının üzərində olan bir qədər pulu və boynundakı boyunbağını götürərək ərazidən uzaqlaşıb.

Zərərçəkənin polisə müraciətindən sonra hüquq-mühafizə orqanlarının əməkdaşları araşdırmalara başlayıb. Təhlükəsizlik kameralarının görüntülərini araşdıran polis şübhəlinin şəxsiyyətini və hərəkət marşrutunu müəyyən edərək onu qısa müddətdə saxlayıb.

Məlum olub ki, M.Ç.-nin daha əvvəl hədə-qorxu, israrlı təqib və insanların rahatlığını pozma maddələri üzrə 5 cinayət qeydiyyatı var.

Ankara Qərb Respublika Prokurorluğu tərəfindən şübhəli barəsində quldurluq və şəxsi qanunsuz olaraq azadlıqdan məhrum etmə maddələri ilə cinayət işi başlanılıb. Onun yaxın vaxtlarda məhkəməyə çıxarılacağı bildirilib.

Telegramda izləyin