Boşanma mərhələsində olduğu həyat yoldaşını boğazından bıçaqladı - VİDEO

Türkiyənin Çatalca rayonunda boşanma mərhələsində olan həyat yoldaşını bıçaqlayan şəxs saxlanılıb.

Sonxeber.az xarici mediaya istinadla xəbər verir ki, hadisə Kaleiçi məhəlləsində yerləşən "Millət Bağı"nda baş verib.

Məlumata görə, Adil Beysi boşanma prosesində olduğu həyat yoldaşı Damla Beysi ilə danışmaq üçün parkda görüşüb. Naməlum səbəbdən tərəflər arasında yaranan mübahisə qısa müddətdə davaya çevrilib.

Bu zaman Adil Beysi üzərində olan bıçaqla həyat yoldaşının boğaz nahiyəsinə zərbə endirib. Ağır yaralanan qadına hadisə yerində ilk yardımı ətrafdakı vətəndaşlar göstəriblər. Şahidlərdən biri köynəyini çıxararaq qanaxmanı dayandırmaq üçün qadının boğazına qoyub, yaxınlıqdakı bələdiyyə əməkdaşları da ilkin tibbi yardıma dəstək veriblər.

Hadisədən sonra şübhəli meşəlik əraziyə qaçaraq gizlənməyə çalışsa da, polis əməkdaşları tərəfindən qısa müddətdə saxlanılıb.

Hadisə yerinə cəlb olunan təcili tibbi yardım briqadası yaralını ilkin müayinədən sonra Başakşehir Çam və Sakura Şəhər Xəstəxanasına çatdırıb. Həkimlərin nəzarətinə götürülən Damla Beysinin huşunun açıq olduğu bildirilib.

Polis hadisənin başvermə səbəblərini araşdırır.

Qeyd edək ki, şübhəlinin hücumdan sonra hadisə yerindən qaçdığı anlar ətrafdakı şəxslər tərəfindən mobil telefonla lentə alınıb.

Telegramda izləyin