Araq bununla qəbul edilir, amma həkimlər bu üsula etiraz edir

Bir çox insan düşünür ki, süfrə arxasında əsas məsələ yaxşı qəlyanaltı etməkdir. Lakin bütün qidalar güclü spirtli içkilərlə eyni dərəcədə uyğun gəlmir.

Lent.az xarici mediaya istinadən xəbər verir ki, bəzi məhsullar nəinki alkoqolun təsirini azaltmır, əksinə, həzm sisteminə düşən yükü artırır və ertəsi gün özünüzü daha pis hiss etməyinizə səbəb ola bilər.

Acqarına qəbul edilən alkoqol qana daha sürətlə sorulur. Bu isə insanın daha tez sərxoş olmasına səbəb olur.

Bundan başqa, mədə selikli qişasının qıcıqlanması riski artır və həzm sistemi ilə bağlı narahatlıqlar yarana bilər.

Mütəxəssislər güclü spirtli içki qəbul etməzdən əvvəl mütləq qidalanmağı və kifayət qədər su içməyi tövsiyə edirlər.

Düzgün seçilmiş qida alkoqolun təsirini aradan qaldırmasa da, orqanizmə düşən yükü müəyyən qədər azalda bilər.

Ən uyğun seçimlər bunlardır:

• yağsız qaynadılmış və ya sobada bişmiş ət;

• toyuq və ya hinduşka əti;

• yağsız balıq;

• turşuya qoyulmuş kələm və digər fermentasiya olunmuş tərəvəzlər;

• tam taxıllı çörək;

• az miqdarda qırmızı kürü ilə hazırlanmış buterbrod;

• liflə zəngin təzə tərəvəzlər.

Bu məhsullar zülal, mürəkkəb karbohidratlar və qida lifləri ilə zəngindir və həzm sisteminin daha rahat işləməsinə kömək edir.

Arağı hansı qidalarla müşayiət etmək məsləhət görülmür?

Sirkəli marinad edilmiş tərəvəzlər

Marinad edilmiş xiyar və pomidor çox sevilən qəlyanaltılar olsa da, tərkibindəki sirkə alkoqolla birlikdə qəbul edildikdə mədə selikli qişasını qıcıqlandıra bilər.

Həddindən artıq duzlu qidalar

Çox duz qəbul etmək orqanizmdə maye itkisini artırır. Alkoqol da susuzlaşdırıcı təsir göstərdiyi üçün bu iki amil birlikdə ertəsi gün vəziyyəti daha da ağırlaşdıra bilər.

Yağlı yeməklər

Piy, yağlı ət, hisə verilmiş məhsullar və digər ağır qidalar qaraciyər, öd kisəsi və mədəaltı vəzi üçün əlavə yük yaradır. Alkoqolla birlikdə qəbul edildikdə orqanizmin işi daha da çətinləşir.

Ağır isti yeməklər

Qovurma, yağlı güveç və digər kalorili isti yeməklər həzmi ləngidə və süfrədən sonra narahatlığı artıra bilər.

Acılı souslar və ədviyyatlar

Xardal, xren, çox ədviyyatlı ketçup, adjika və acı bibər mədəni əlavə qıcıqlandırır və özünü pis hiss etmə ehtimalını artırır.

Şirniyyatlar və şirin meyvələr

Tort, konfet, üzüm, banan və şəkəri çox olan digər məhsullar güclü spirtli içkilərlə uyğun hesab edilmir. Çox şəkər alkoqolun orqanizmdə parçalanmasını ləngidə və qıcqırma prosesini gücləndirə bilər.

Telegramda izləyin