ABŞ-İran müharibəsi: Tehran Hörmüz boğazının açılması üçün ABŞ-dan güzəştlər tələb edir

İran və ABŞ arasında müharibənin dayandırılması və Hörmüz boğazının yenidən açılması ilə bağlı diplomatik səylər davam edir. Lakin Tehran boğazın tam açılmasını Vaşinqtonun bir sıra tələbləri yerinə yetirməsi ilə əlaqələndirir.

"Reuters" xəbər verir ki, İran Hörmüz boğazının açılması üçün ABŞ-dan İrana dəymiş zərərə görə kompensasiya ödəməsini, sanksiyaları aradan qaldırmasını və digər güzəştlərə getməsini tələb edir. Tehran həmçinin ABŞ-ın hərbi təzyiqinin dayandırılmasını istəyir.

Sonxeber.az Reuters-ə istinadən xəbər verir ki, İranın xarici işlər naziri Abbas Əraqçi bildirib ki, hazırda ABŞ və İran arasında birbaşa danışıqlar aparılmır. Onun sözlərinə görə, tərəflər arasında mesaj mübadiləsi vasitəçilər üzərindən həyata keçirilir.

Bununla yanaşı, İran və Oman arasında Hörmüz boğazından gəmiçilik üçün mümkün razılaşma üzrə müzakirələr davam edir. Tehran razılaşmanın yaxın olduğunu bildirsə də, bunun avtomatik olaraq boğazın tam açılması demək olmadığını vurğulayır.

ABŞ Prezidenti Donald Tramp isə danışıqların davam etdiyini və vəziyyətin diplomatik yollarla həll edilə biləcəyini bildirib. Vaşinqton son günlər İrana qarşı yeni genişmiqyaslı hərbi əməliyyatlardan daha çox iqtisadi təzyiqə üstünlük verir.

Hörmüz boğazındakı qeyri-müəyyənlik dünya enerji bazarlarına da təsir göstərir. Reuters-in 10 avqust məlumatına görə, Brent markalı neftin qiyməti təxminən 2 faiz artaraq 85 dollar ətrafına yüksəlib.

Hazırda müharibənin taleyində əsas məsələlərdən biri Hörmüz boğazının hansı şərtlərlə və nə vaxt açılacağıdır. Tehran ABŞ-dan ciddi güzəştlər tələb edir, Vaşinqton isə İranı danışıqlar masasına gətirmək üçün iqtisadi və siyasi təzyiqi davam etdirir.

Telegramda izləyin