Canavar zənn edib atəş açdı, həyat yoldaşını vurdu

Türkiyənin Elazığ şəhərində kiçikbuynuzlu heyvanlarını canavarlardan qorumaq üçün tövlədə ov tüfəngi ilə növbə çəkən 61 yaşlı M.K. eşitdiyi səsə doğru atəş açıb. Canavar vurduğunu düşünən kişi tövləyə daxil olduqda həyat yoldaşı, 51 yaşlı Hasret Kuşu qanlar içində yerdə tapıb.

Sonxeber.az xarici mediaya istinadla xəbər verir ki, faciə Elazığ şəhərinin Meşeli kəndində gecə saatlarında baş verib. Məlumata görə, iki gün əvvəl M.K.-nın saxladığı kiçikbuynuzlu heyvanların olduğu tövləyə canavarların girdiyi müəyyən edilib. Buna görə də 61 yaşlı kişi növbəti hücumun qarşısını almaq məqsədilə ov tüfəngi ilə gecələr tövlənin yaxınlığında keşik çəkməyə başlayıb.

Gecə saatlarında tövlədən səs gəldiyini eşidən M.K. canavarların yenidən əraziyə girdiyini düşünüb. O, səsin gəldiyi istiqamətə doğru ov tüfəngi ilə atəş açıb.

Silah səsindən sonra vəziyyəti yoxlamaq üçün tövləyə gedən kişi dəhşətli mənzərə ilə qarşılaşıb. Canavar vurduğunu düşünən M.K. həyat yoldaşı Hasret Kuşu güllə yarası almış vəziyyətdə tapıb.

Hadisə barədə məlumat verildikdən sonra əraziyə təcili tibbi yardım və jandarma əməkdaşları göndərilib. Həkimlərin müayinəsi zamanı 51 yaşlı qadının həyatını itirdiyi müəyyən olunub.

Prokurorun hadisə yerində apardığı araşdırmadan sonra Hasret Kuşun cənazəsi yarılma proseduru üçün Fırat Universiteti Xəstəxanasının morquna aparılıb.

Həyat yoldaşının ölümünə səbəb olan M.K. isə jandarma tərəfindən saxlanılıb. Hadisə ilə bağlı araşdırma davam edir.

Telegramda izləyin