Gənclərdə xərçəngin bu növü AŞKARLANIR: Səbəb nədir? - AÇIQLAMA

Bağırsaq xərçənginin daha gənc yaşlarda aşkarlanması son illərdə diqqət çəkən tendensiyalardandır. Bunun səbəbləri tam müəyyən edilməsə də, ailəvi-genetik faktorlarla yanaşı, qidalanma, artıq çəki, fiziki passivlik, siqaret və bağırsağın xroniki iltihabi xəstəlikləri risklə əlaqələndirilir.

Bəs, gənclər hansı əlamətlərə diqqət etməli, hansı hallarda həkimə müraciət etməlidirlər və xəstəliyin erkən aşkarlanması müalicənin nəticələrinə necə təsir edir?
Məsələ ilə bağlı Sonxeber.az-a açıqlama verən tibb eksperti Şahvələd Məmmədov bildirib ki, yaşla əlaqədar olaraq Azərbaycan insanlarının həyat tərzinə və qida rejiminə fikir versək, görərik ki, insanlar daha çox kalorili, ağır, ət yeməklərinə, gec həzm olunan qidalara meyllidirlər.

"Xüsusilə gənclər arasında fast-food, ağır və gec həzm olunan yeməklərə üstünlük verilməsi müşahidə olunur. Metabolik sindromu, köklüyü və oturaq həyat tərzi olan insanlarda hərəkətsizlik, adinamiya və digər bu kimi amillər bir sıra xəstəliklərə yol aça bilər. Amma 40 yaşdan yuxarı şəxslərdə, xüsusilə qəbizliyə və ya ishala meyllilik, bağırsaq sancıları və digər bu kimi problemlər olduqda, mütəmadi müayinələrdən keçmək məsləhət görülür. Erkən diaqnostika müalicə baxımından çox vacibdir. Bağırsaq xərçənginin daha erkən yaşlarda aşkarlanması da mümkündür. Erkən diaqnostika, öz növbəsində, erkən müalicəyə imkan yaradır. Operativ müdaxilədən sonra əlavə metastazların qarşısının alınması xəstənin uzunmüddətli yaşamasına və həyat keyfiyyətinin yaxşılaşmasına səbəb ola bilər".

Röyalə Xəyal

Telegramda izləyin