Bölgələrdə istirahət üçün nə qədər vəsait lazımdır? - AÇIQLAMA

Bölgələrdə ailəvi istirahətin qiyməti seçilən rayon, otelin səviyyəsi, mövsüm və göstərilən xidmətlərdən asılı olaraq ciddi dəyişir. Hazırkı tur paketlərində 2 gün/1 gecəlik standart istirahət təxminən 100-200 manat, daha komfortlu və premium paketlər isə 250-400 manat aralığında təklif olunur.

Bəs, 3-4 nəfərlik ailənin bölgələrdə 2-3 günlük istirahəti üçün real olaraq nə qədər büdcə ayırmaq lazımdır, otel, qidalanma və nəqliyyat xərcləri ümumi məbləği nə qədər artırır?
Mövzu ilə bağlı Sonxeber.az-a açıqlama verən turizm eksperti Cəfər Qarayev bildirib ki, hazırda Azərbaycanda 3-4 nəfərlik ailənin bölgələrdə 2-3 günlük orta səviyyəli istirahəti təxminən 500-900 manata başa gəlir:

"Daha ekonom seçimlərə üstünlük verildikdə bu məbləği 350-500 manat civarında saxlamaq mümkündür. Yüksək səviyyəli hotellər və əlavə xidmətlər seçildikdə isə ümumi xərc 1 000-1 500 manatı keçə bilər. Qiymətlər bölgədən bölgəyə dəyişir. Xüsusilə Qəbələ, Quba-Qusar və Şahdağ kimi turist tələbatının yüksək olduğu istiqamətlərdə həftəsonu və bayram günlərində qiymətlər daha çox artır. Burada otelin səviyyəsi, mövsüm, doluluq, qidalanma və əlavə xidmətlər əsas qiymət amilləri hesab olunur".

Ekspertlərin fikrincə, əsas məsələ yalnız qiymətin baha və ya ucuz olması deyil:

"Turist ödədiyi məbləğin qarşılığında keyfiyyətli xidmət əldə etməlidir. Eyni zamanda, daxili turizmin daha əlçatan olması üçün ailələrin müxtəlif büdcələrinə uyğun ekonom, orta və premium kateqoriyalarda daha çox seçim təqdim edilməlidir. Bölgələrdə qiymətlərə tələb və təklif də ciddi təsir göstərir. Turist axınının yüksək olduğu ərazilərdə hotellərin sayı, mövsümilik, doluluq faizi, xidmət səviyyəsi və əməliyyat xərcləri qiymətlərin formalaşmasında əsas amillərdəndir. Həftəsonu qiymətlərinin həftəiçi günlərlə müqayisədə 20-50 faizədək yüksək olması da müşahidə olunur".

Röyalə Xəyal

Telegramda izləyin