Avtomobil bazarında qiymətlər artacaq? - AÇIQLAMA

Avtomobil bazarında son dövrdə canlanma və tələbin artması qiymətlərin gələcək dinamikası ilə bağlı suallar yaradır. Eyni zamanda, avtomobil idxalının həcmi, yeni modellərin bazara daxil olması və valyuta məzənnəsi qiymətlərə təsir edən əsas amillər sırasındadır. 2025-ci ildə Azərbaycana minik avtomobili idxalı 38,1 faiz artaraq 113 840 ədədə çatıb.

Bəs, yaxın dövrdə avtomobil qiymətlərində artım gözlənilirmi, tələbin yüksəlməsi ilə yanaşı idxal həcminin artması və yeni avtomobillərin bazara daxil olması qiymətlərə necə təsir göstərəcək, valyuta məzənnəsində dəyişikliklər hansı rol oynaya bilər?
Mövzu ilə bağlı Sonxeber.az-a açıqlama verən nəqliyyat eksperti Razil Nağıyev bildirib ki, avtomobil bazarında müşahidə olunan canlanma fonunda yaxın aylarda müəyyən qiymət artımı mümkündür.

"Lakin bunu bütün avtomobillərin kəskin bahalaşması kimi qiymətləndirmək düzgün olmaz. Burada əsas faktor tələb və təklif arasındakı balansdır. Tələbin artması ilə yanaşı idxal həcminin azalması müəyyən modellərdə qiymətlərin yüksəlməsinə əlavə təzyiq yarada bilər. Digər tərəfdən, yeni avtomobillərin, xüsusilə Çin istehsalı modellərin bazara daha çox daxil olması rəqabəti artırır və qiymət artımını müəyyən qədər məhdudlaşdırır. Bu səbəbdən ikinci əl bazarında da bütün avtomobillər üzrə eyni dinamikanı gözləmək olmaz. Daha çox az yürüşlü, qəzasız və bazarda tələbi yüksək olan avtomobillərin qiymətində artım ehtimalı var".

Ekspert bildirib ki, valyuta məzənnəsi də əsas amillərdən biridir:

"Manatın məzənnəsinin sabit qalması qiymətlərə əlavə təzyiqin qarşısını alır. Əgər məzənnə sabitliyi qorunarsa, yaxın 3-6 ayda bazarda daha çox ümumi sabitlik və ayrı-ayrı seqmentlər üzrə seçici bahalaşma gözləyirəm. Tələb artımı və idxalın məhdud qalması davam edərsə, bəzi likvid modellərdə 5-10 faiz civarında qiymət artımı mümkündür".

Röyalə Xəyal

Telegramda izləyin