Alimlər LED lampaların yuxu rejimi və psixikaya zərərlərini açıqladılar

Amerikalı alimlərin rəhbərlik etdiyi beynəlxalq psixiatrlar qrupu parlaq diod (LED) lampaların psixi sağlamlıq üçün yarada biləcəyi təhlükələr barədə xəbərdarlıq ediblər. Mütəxəssislərin sözlərinə görə, bu cür işıq mənbələrindən gələn güclü mavi işıq melatonin hormonunun ifrazını ləngidir. Bu da öz növbəsində sirkad ritmlərini ciddi şəkildə pozur və psixi problemləri olan şəxslərdə maniakal vəziyyətlərə səbəb ola bilər.

Oxu.Az xəbər verir ki, bu barədə "The Straits Times" nəşri məlumat yayıb.

Son onilliklərdə karbon emissiyalarını azaltmaq məqsədilə dünyanın hər yerində ənənəvi natrium fənərlərini enerjiyə qənaət edən LED lampalarla əvəz ediblər. Lakin ekoloji faydalarla yanaşı, bəşəriyyət mavi spektrin zərərli təsiri problemi ilə də üzləşib.

Mütəxəssislər izah edirlər ki, hələ 1990-cı illərdə gözün tor qişasında melanopsin adlı fotopiqment aşkar edilib. O, məhz mavi işığa qarşı çox həssasdır və daxili bioloji saatın tənzimlənməsinə cavabdehdir. Fənərlərdən və mobil telefon ekranlarından gələn mavi şüalanma beyinə gündüz olduğu siqnalını verir ki, bu da həddindən artıq oyaqlığa, yuxusuzluğa və xroniki yuxu çatışmazlığına gətirib çıxarır.

Telegramda izləyin