Azərbaycanda emal sənayesi 3 %-dən çox böyüyüb

Bu ilin yanvar-avqust aylarında Azərbaycanın emal sənayesində 14 milyard 912,1 milyon manat dəyərində məhsul istehsal olunub və sənaye xarakterli xidmətlər göstərilib.

Sonxeber.az bu barədə Dövlət Statistika Komitəsinə istinadən xəbər verir.

Məlumata görə, bu, ötən ilin eyni dövrü ilə müqayisədə 3,4 % çoxdur.

Emal sənayesində daha çox artım avtomobil, qoşqu və yarımqoşquların istehsalı (+89,3 %), əczaçılıq məhsullarının istehsalı (+48,4 %), mebeldən başqa ağacın emalı və ağacdan məmulatların istehsalı (+38,7 %), toxuculuq sənayesi (+28,8 %), tütün məmulatlarının istehsalı (+16,3 %), kağız və karton istehsalı (+14,1 %), rezin və plastik kütlə məmulatlarının istehsalı (+9,2 %), tikinti materiallarının istehsalı (+9 %), dəri və dəridən məmulatların, ayaqqabıların istehsalı (+8 %), qida məhsullarının istehsalı (+7,9 %), metallurgiya sənayesi (+6,9 %), elektrik avadanlıqlarının istehsalı (+5,4 %) sahələrində olub.

Xatırladaq ki, 8 ay ərzində ölkədə sənaye istehsalının ümumi dəyəri illik müqayisədə 0,4 % azalaraq 44 milyard 620,3 milyon manat, o cümlədən neft-qaz sənayesi istehsalının ümumi dəyəri 1,5 % azalaraq 30 milyard 14,4 milyon manat, qeyri-neft-qaz sənayesi istehsalının ümumi dəyəri 5,4 % artaraq 14 milyard 605,9 milyon manat olub.

Telegramda izləyin