"Aşk-ı Memnu"nun ulduzundan pis xəbər: danışmaq və yazmaq qabiliyyətini itirdi

"Aşk-ı Memnu" serialında Arsen xanım obrazı ilə yaddaşlarda qalan tanınmış türk teatr və kino aktrisası Gülsen Tuncerin səhhəti ilə bağlı kədərli xəbər yayılıb.

Sonxeber.az xarici mediaya istinadla xəbər verir ki, 81 yaşlı sənətçinin beynində 2-ci dərəcəli şiş aşkarlanıb. Xəstəliyi səbəbilə Tuncerin danışmaq və yazmaq qabiliyyətini itirdiyi bildirilib. Hazırda müalicəsi davam edən aktrisanın vəziyyəti sənət ictimaiyyəti və pərəstişkarlarını narahat edib.

Karyerası ərzində çoxsaylı teatr tamaşalarında, filmlərdə və televiziya layihələrində rol alan Gülsen Tuncer türk sənət dünyasının tanınmış simalarından biridir.

Sənətçinin səhhəti ilə bağlı Film Fondu tərəfindən də açıqlama verilib. Qurumun sosial media hesabında yayımlanan paylaşımda Tuncerə şəfa arzulanıb və onun hazırda ağır xəstəliklə mübarizə apardığı bildirilib.

Açıqlamada "Çox dəyərli aktrisa Gülsen Tuncerə Allahdan təcili şəfa diləyirik. Hazırda ağır bir xəstəliklə mübarizə aparır. Dualarımız onun üçün olsun" ifadələri yer alıb.

Xəbərin yayılmasından sonra sənət dünyasından və sosial mediadan Gülsen Tuncerə çoxsaylı dəstək və keçmiş olsun mesajları göndərilib.

Telegramda izləyin