Tətilə gedən ovçular küçədə qaban sürüsü ilə qarşılaşdı: Başmaqlarını heyvanlara atdı - VİDEO

Türkiyənin Kütahya şəhərindən Muğlanın Marmaris rayonuna tətilə gedən 4 ovçu gecə saatlarında küçədə dolaşan 5 vəhşi qabanla qarşılaşıb.

Sonxeber.az xarici mediaya istinadla xəbər verir ki, hadisə zamanı ovçulardan Mehmet Özkanın ayağındakı başmaqları çıxararaq qaçan qabanların arxasınca atması sosial mediada böyük maraq doğurub.

Kütahyanın Hisarcık rayonundan Marmarisə tətilə gedən Hisarcık Mərkəz Ovçuluq və Atıcılıq İxtisas Klubunun rəhbəri Mehmet Özkan və 3 ovçu dostu Çamdibi məhəlləsində qaldıqları evin terrasından gecə saatlarında küçədə hərəkət edən qabanları görüblər.

Saat 02:00 radələrində 5 vəhşi qabanı görən dostlar əvvəlcə təəccüblənib, daha sonra terrasdan enərək heyvanların olduğu küçəyə çıxıblar. Ovçuları görən qabanlar isə sürətlə qaçmağa başlayıb.

Dörd dost heyvanların arxasınca qaçarkən Mehmet Özkan ayağındakı başmaqları çıxararaq qaçan qabanlara tərəf atıb. Qeyri-adi anlar mobil telefon kamerası ilə lentə alınıb.

Özkan daha sonra görüntüləri sosial media hesabında paylaşaraq hadisənin necə baş verdiyini danışıb.

O bildirib ki, dostları ilə birlikdə Marmarisə tətilə gediblər və gecə saatlarında terrasda istirahət edərkən küçədə 5 qaban gördükləri üçün təəccübləniblər. Onun sözlərinə görə, heyvanlar onları gördükdən sonra qaçmağa başlayıb və onlar da qabanların arxasınca qaçıblar. Bu zaman Özkan qeyri-ixtiyari olaraq ayağındakı başmaqları heyvanların arxasınca atıb.

Hadisənin görüntüləri sosial mediada qısa müddətdə geniş yayılıb və istifadəçilərin böyük marağına səbəb olub.

Mehmet Özkan paylaşımına "Bəzən sadəcə izləyirsən, əlindən heç nə gəlmir. İzləmək də həyəcanverici idi" qeydini əlavə edib.

Telegramda izləyin