Bir ev puluna bütün kəndi satın aldı

ABŞ-li sahibkar Jason Lee Beckwith İspaniyanın Zamora əyalətində 37 ildir heç kimin yaşamadığı Salto de Castro kəndini 310 min avroya satın alıb.

Sonxeber.az xarici mediaya istinadla xəbər verir ki, satış nəticəsində sahibkar yalnız kəndin torpaqlarına deyil, ərazidə yerləşən çoxsaylı tikililərə də sahib olub. Kənddə 44 ev, məktəb, bar, keçmiş kazarma binaları və tarixi kilsə yerləşir.

Salto de Castro kəndi 1946-cı ildə bölgədəki hidroelektrik stansiyada çalışan işçilərin və onların ailələrinin məskunlaşması üçün salınıb. Kəndin son sakinləri 1989-cu ildə ərazini tərk etdikdən sonra yaşayış məntəqəsi tamamilə boş qalıb.

Beckwith-in kəndi özünə şəxsi yaşayış məkanı yaratmaq üçün almadığı bildirilir. ABŞ-li sahibkarın əsas məqsədi tərk edilmiş kəndi turizm və yaşayış kompleksinə çevirməkdir.

İspaniyanın Sənaye və Turizm Nazirliyi tərəfindən təsdiqlənən layihə çərçivəsində kənddəki mövcud tikililərin bərpası nəzərdə tutulur. Layihənin ilkin mərhələsində otel otaqları, restoran, resepsiyon, üzgüçülük hovuzu və müxtəlif sosial məkanların yaradılması planlaşdırılır.

Kəndin inkişafı üçün ümumilikdə təxminən 6 milyon avro (təxminən 338 milyon TL) investisiya qoyulmasının planlaşdırıldığı bildirilir.

Telegramda izləyin