İtinizə verdiyiniz ləzzətli yemək təhlükə yarada bilər: "10 faizi keçməməlidir"

İtlərə hər gün ləzzətli yemək vermək düzgün miqdarda və keyfiyyətli məhsullardan istifadə edildiyi halda faydalı vərdiş ola bilər.

Oxu.Az xəbər verir ki, kinoloq İrina Şarıpova bu barədə Gazeta.ru-ya danışıb.

Mütəxəssis bildirib ki, dadlı yeməklər əsasən təlim və funksional məhsullara bölünür. Təlim zamanı verilən kiçik porsiyalar itin düzgün davranışını möhkəmləndirməyə kömək edir. Davranış formalaşdıqca ləzzətli yeməklərin miqdarı azaldılaraq tərif və oyunla əvəz edilə bilər.

Funksional ləzzətli yeməklər isə heyvanın sağlamlığını dəstəkləmək üçün istifadə olunur. Dişlər üçün nəzərdə tutulan çeynəmə məhsulları ərpi azaltmağa və diş ətlərini masaj etməyə kömək etsə də, dişlərin fırçalanmasını əvəz etmir. Vitaminli dadlı yeməkləri isə baytar məsləhəti olmadan seçmək tövsiyə edilmir.

Şarıpovanın sözlərinə görə, ləzzətli yeməklər itin gündəlik qida rasionunun 10 faizindən çoxunu təşkil etməməlidir. Əks halda artıq çəki və həzm problemləri yarana bilər.

İki aydan kiçik balalara dadlı yemək verilməsi tövsiyə edilmir. 2-3 aylıq balalara isə yumşaq və tərkibi sadə məhsullar minimal miqdarda verilməlidir.

Xroniki xəstəlikləri olan itlərə hər hansı ləzzətli yeməyin verilməsi isə əvvəlcədən baytarla razılaşdırılmalıdır.

"Ləzzətli yeməklər ərköyünlük vasitəsi deyil, düzgün istifadə edildikdə tərbiyə və qayğının bir hissəsidir", - deyə ekspert vurğulayıb.

Telegramda izləyin