İş saatlarının dəyişdirilməsi tıxac problemini həll edə biləcək? - AÇIQLAMA

Bakıda nəqliyyat sıxlığının əsas səbəblərindən biri hər gün on minlərlə insanın eyni saatlarda şəhər daxilində hərəkət etməsidir. AYNA da paytaxt və Abşeron yarımadasında xüsusilə eyni saatlarda şəhər mərkəzinə yönələn hərəkətin magistral yollarda ciddi sıxlıq yaratdığını qeyd edir. Bu baxımdan işə başlama və bitirmə saatlarının fərqləndirilməsi nəqliyyat axınının pik saatlardan daha geniş zaman aralığına bölünməsi baxımından müzakirə olunan həllərdən biri ola bilər.

Bəs, çevik iş saatlarının tətbiqi Bakıdakı nəqliyyat sıxlığının azalmasına nə dərəcədə təsir göstərə bilər, işə başlama və bitirmə saatlarının fərqləndirilməsi pik saatlarda avtomobil və ictimai nəqliyyata düşən yükü azaltmaq üçün nə qədər effektiv həll ola bilər və bunun üçün hansı sahələrdə fərqli iş qrafiklərinin tətbiqi daha məqsədəuyğun olar?
Mövzu ilə bağlı Sonxeber.az-a açıqlama verən nəqliyyat eksperti Razil Nağıyev bildirib ki, Bakı şəhərində nəqliyyat sıxlığının azaldılması üçün çevik iş saatlarının tətbiqi effektiv tədbirlərdən biri ola bilər.

"Burada əsas məqsəd avtomobillərin ümumi sayını azaltmaq deyil, eyni vaxtda yola çıxan nəqliyyat vasitələrinin sayını azaltmaq və pik saatlarda yaranan yükü gün ərzində daha geniş zaman intervalına yaymaqdır. Hazırda işə başlama və işdən çıxma saatlarının böyük hissəsinin eyni vaxta düşməsi səhər və axşam pik saatlarında həm avtomobil yollarında, həm də ictimai nəqliyyatda əlavə yüklənmə yaradır".

Ekspert bildirib ki, əgər müxtəlif müəssisə və təşkilatlarda iş saatları, məsələn, 08:00, 09:00 və 09:30 kimi fərqli vaxtlara bölünsə, insanların şəhər üzrə hərəkəti daha bərabər paylana bilər:

"Nəticədə müəyyən vaxt aralığında yollara çıxan avtomobillərin və ictimai nəqliyyatdan istifadə edən sərnişinlərin sayı azala bilər. Bu yanaşmanın ictimai nəqliyyat baxımından da əhəmiyyəti böyükdür. Sərnişin axınının pik saatlarda həddindən artıq cəmlənməməsi avtobus və metroda sıxlığın azalmasına, avtobusların hərəkət intervalının daha stabil saxlanmasına və bəzi marşrutlarda pik saatlarda yaranan əlavə yükün idarə olunmasına imkan verə bilər".

Röyalə Xəyal

Telegramda izləyin